जत तालुक्यातील सोरडी येथे प्रकार
जत, प्रतिनिधी
जत तालुक्यातील सोरडी येथील जिल्हा बँकेच्या शाखेत बनावट सोने देऊन शाखेला २५ लाख ७३ हजार रूपयांचा गंडा घातल्या प्रकरणी सात कर्जदार व सराफ अशा आठ जणांवर जत पोलीस ठाण्यात गुन्हा नोंद करण्यात आला आहे.याप्रकरणी जत पोलीस ठाण्यात जिल्हा बँकेचे जत मार्केट यार्ड शाखेतील तालुका विभागीय अधिकारी राजेंद्र नाटेकर यांनी फिर्याद दिली आहे.
त्यांनी दिलेल्या फिर्यादीत म्हटले आहे, दिनांक 26 ऑक्टोंबर 2022 ते 13.04.2023 दरम्यान सांगली जिल्हा मध्यवती सहकारी बँक लि. शाखा सोरडी येथे सोने कर्ज खातेदार शहाजी मारुती तुराई रा. राजोबावाडी, अस्लम अमिन मुलाणी रा. दरीकोणुर, धोंडाप्पा भिमराम गावडे रा. सोरडी, आशाबाई आप्पासाहेब टेंगले रा. सोरडी, धनाजी भिमराव पुजारी रा. दरीकोणुर, अंकुश सदाशिव मलमे रा. दरीकोणुर, माय्याका भिवा गावडे रा. सोरडी यांनी मिळून संगनमत करून बँकेत बनावट 17 सोन्याचे जिनस ठेवुन फसवणूक केल्याचे उघड झाले आहे.
तसेच बँकेचा व्हॅल्युएटर सराफ संजय विठ्ठल सावंत (रा. माडग्याळ ता. जत)याने ते सोने खरे असल्याचे मुल्यांकन (व्हॅल्युएशन) लेखी स्वरुपात बँकेच्या कर्जरोख्याच्या फॉरमॅट मध्ये स्वतः च्या सहीशिक्याने प्रमाणीत केले होते. सदरचे जिनस बँकेस तारण म्हणून बनावट सोने गहान देऊन त्या तारणावर एकूण कर्ज रक्कम 25 लाख 73 हजार रुपये अशी रक्कम सात कर्जदार व व्हॅल्युएटर सराफ संजय विठ्ठल सावंत यांनी संगनमत करून घेवून सोरडी बँक शाखेची फसवणुक केली आहे. असे फिर्यादीत म्हटले आहे. या प्रकरणी जत पोलिसात गुन्हा दाखल झाला आहे.
