चार्टर्ड अकौंटंट ऑफ इंडियातर्फे ‘संवाद’-‘सहयोग’ कार्यक्रम

बेळगाव : इन्स्टिट्यूट ऑफ चार्टर्ड अकौंटंट ऑफ इंडियाच्या बेळगाव शाखेतर्फे स्टार्टअप संवाद व एमएसएमई सहयोग या कार्यक्रमाचे आयोजन केले होते. या कार्यक्रमाला प्रमुख पाहुणे म्हणून दिलीप चांडक होते. दिलीप चांडक म्हणाले, व्यवसाय, उद्योग यामध्ये चार्टर्ड अकौंटंटची भूमिका महत्त्वाची असते. तसेच बेळगावच्या उद्योगक्षेत्रात ऑटोमोबाईल, स्पेअरपार्ट निर्मिती विभागाने मोठे काम केल्याची माहिती त्यांनी दिली. सीए एम. एस. तिगडी यांनी उपस्थितांचे स्वागत करत सांगितले की, बेळगाव चेंबर ऑफ कॉमर्स, स्मॉलस्केल असोसिएशन, लघुउद्योग भारती अशा विविध संघटनांमुळे बेळगावच्या उद्योगक्षेत्रात भरीव काम सुरू आहे. लहान उद्योग मोठ्या स्तरावर येण्यासाठी चार्टर्ड अकौंटंट कसे मदत करू शकतात, हे त्यांनी सांगितले. सीए राजेंद्र मुंदडा यांनी मान्यवरांचा सत्कार केला. सीए योगेश कुलकर्णी यांनी स्टार्टअपला भांडवल पुरवठा याविषयीची माहिती दिली. उद्योजक अजित पाटील यांनी बेळगाव शहरात सुरू असलेल्या स्टार्टअपविषयी माहिती दिली. जीआयटी कॉलेजचे डॉ. रविराज कुलकर्णी यांनी नॅनो टेक्नॉलॉजी विषयात सुरू असलेल्या स्टार्टअपबद्दल मार्गदर्शन केले. यावेळी मुदीत मुदगल, सचिन सबनीस, सी. सी. होंडदकट्टी यांच्यासह इतर उपस्थित होते. सीए वीराण्णा मुरगोड यांनी सूत्रसंचालन केले.