अंगणवाडी सेविकांचे दोन महिन्यांपासून वेतन थकीत

बेळगाव : मागील दोन महिन्यांपासून अंगणवाडी सेविका आणि मदतनीसांचे वेतन थकीत करण्यात आले आहे. त्यामुळे त्यांच्यासमोर अनेक अडचणी निर्माण झाल्या आहेत. एप्रिल आणि मे महिन्याचे वेतन मिळाले नसल्याने सेविका प्रतिक्षेत आहेत. बेळगाव जिल्ह्यात 5 हजार 531 लहान मोठी-अंगणवाडी केंद्रे आहेत. त्यामध्ये 6 हजार 600 अंगणवाडी सेविका आणि मदतनीस कार्यरत आहेत. मात्र दोन महिन्यांचे वेतन थांबल्याने त्यांच्यासमोर चिंता निर्माण झाली आहे. महिला व बाल कल्याण मंत्री बेळगाव जिल्ह्याच्या आहेत. मात्र बेळगाव जिल्ह्यातीलच अंगणवाडी सेविकांचे वेतन विस्कळीत झाल्याचे दिसत आहे. आधीच महागाईने कहर केला आहे. त्यातच वेतन मिळत नसल्याने सेविका चिंताग्रस्त बनल्या आहेत. अंगणवाडीच्या शैक्षणिक वर्षाला आता प्रारंभ झाला आहे. त्यामुळे अंगणवाड्या बालकांनी गजबजू लागल्या आहेत. मात्र अंगणवाडीतील सेविका आणि मदतनीसांच्या वेतनाचा प्रश्न निर्माण झाला आहे. आता जून महिन्यामध्ये तरी वेतन मिळणार का? या विवंचनेत सेविका आहेत.