सह्याद्री सोसायटीतर्फे विद्यार्थ्यांना मोफत वह्यावाटप

बेळगाव : बसरीकट्टी येथील दक्षिण महाराष्ट्र शिक्षण मंडळ संचालित श्री महालक्ष्मी हायस्कूल येथे दि सह्याद्री मल्टिपर्पज को. ऑप. सोसायटीतर्फे हायस्कूलमधील गरीब व होतकरू विद्यार्थ्यांसाठी गणवेश व वह्या वाटप कायक्रम उत्साहात पार पडला. प्रास्ताविक मुख्याद्यापक पी. जी. गावडे यांनी केले. व्हाईस चेअरमन एम. बी. निर्मळकर यांच्या हस्ते महात्मा फुलेच्या प्रतिमेचे पूजन करण्यात आले. मान्यवरांच्या हस्ते दीपप्रज्वलन झाले. यावेळी पुष्प देऊन पाहुण्यांचे स्वागत करण्यात आले. अध्यक्षस्थानी मारुती अमनगी होते. सोसायटीच्या नफ्यातून काही रक्कम बहुजन समाजातील मुलांना उपयोगी व्हावी यासाठी आपण हा कार्यक्रम राबवत असल्याचे प्रमुख वक्ते पी. पी. बेळगावकर यांनी सांगितले. यावेळी सिद्राई नागरोळी व बी. के. कोंडस्कोप यांनी मनोगत व्यक्त केले. याप्रसंगी अनिल कणबरकर, एन. बी. खांडेकर आर. बी. बांडगी, यल्लाप्पा चौगुले, शिवाजी सांबरेकर उपस्थित होते.