वृत्तसंस्था/ अबुधाबी
2023 च्या टेनिस हंगामातील डब्ल्यूटीए टूरवरील येथे सुरू झालेल्या अबुधाबी खुल्या महिलांच्या टेनिस स्पर्धेत विद्यमान विम्बल्डन विजेती इलेना रिबेकिना आणि माजी टॉप सिडेड कॅरोलिना प्लिसकोवा यांच्यात गुरुवारी दुसऱया फेरीतील सामना खेळवला जात आहे.
या स्पर्धेतील मंगळवारी झालेल्या पहिल्या फेरीतील सामन्यात पाचव्या मानांकित ओस्टापेंकोने डॅनिली कॉलिन्सचा तीन सेटस्मधील लढतीत पराभव करत विजयी सलामी दिली. तर दुसऱया एका सामन्यात कोस्टय़ूकने सिरेस्टीवर मात करत दुसऱया फेरीत स्थान मिळवले. रिबेकिनाने 2023 च्या टेनिस हंगामात ऍडलेडमधील झालेल्या दोन स्पर्धांमध्ये आपला सहभाग दर्शवला होता. कजाकस्तानच्या रिबेकिनाला ऍडलेड स्पर्धेत झेकच्या क्विटोवाकडून पहिल्याच फेरीत हार पत्करावी लागली होती. रिबेकिना आणि प्लिसकोवा यांच्यात आतापर्यंत 2022 च्या टेनिस हंगामात दोन वेळा गाठ पडली होती आणि रिबेकिनाने हे दोन्ही सामने जिंकले होते.
