पुणे / प्रतिनिधी :
सरकारने जाहीर केलेल्या गाळप हंगामाच्या तारखेअगोदर गाळप सुरू केल्याप्रकरणी गुन्हा दाखल असलेल्या आमदार रोहित पवार यांच्या बारामती ॲग्रो कारखान्याला साडेचार लाख रुपयांचा दंड ठोठावण्यात आला आहे.
आमदार रोहित पवार यांच्या इंदापूर तालुक्यातील शेटफळगढे येथील बारामती ॲग्रो साखर कारखान्याने यंदाचा गाळप हंगाम 15 ऑक्टोबरला सुरू करण्याचे निर्देश दिले असतानाच 12 ऑक्टोबरला गाळप घेण्यास सुरुवात केल्याचा ठपका ठेवण्यात आला होता. याप्रकरणी भाजप आमदार राम शिंदे यांनी तक्रार दाखल केली होती. या तक्रारीनुसार गुन्हा दाखल करण्यात आला होता.
राम शिंदे यांनी राष्ट्रवादीचे आमदार रोहित पवार यांच्या बारामती ॲग्रो साखर कारखान्याची चौकशी करण्यात यावी, अशी मागणी केली होती. याबाबतचे निवेदन साखर आयुक्त शेखर गायकवाड यांना शिंदे यांच्याकडून देण्यात आले होते. 15 ऑक्टोबरपूर्वी परवानगी न घेता साखर कारखाने सुरू केल्यास गुन्हा दाखल करण्याचे आदेश असताना कारखाना सुरू केल्याबाबतची तक्रार त्यांनी साखर आयुक्तांकडे केली. या पार्श्वभूमीवर बारामती ॲग्रोस याप्रकरणी साडेचार लाख रुपयांचा दंड करण्यात आला असल्याचे साखर आयुक्त गायकवाड यांनी पत्रकारांशी बोलताना सांगितले.
दरम्यान, राम शिंदेंच्या तक्रारीनंतर साखर आयुक्तांनी याप्रकरणी अजय देशमुख या अधिकाऱ्याची चौकशी समिती नेमली होती. त्यानंतर या चौकशी समितीने रोहित पवार यांना क्लिनचीट दिली. मात्र, अजय देशमुख यांचे निलंबन करण्यात आले. त्यानंतर सहकार विभागाकडे राम शिंदे यांनी तक्रार दाखल केली. त्यानंतर आता पुन्हा एकदा व्यवस्थापकीय संचालक सुभाष गुळवे यांच्यावर भिगवण पोलीस ठाण्यात गुन्हा दाखल करण्यात आला आहे.
