शनिवारी, रविवारी रोड शोसह सभांचे आयोजन
बेळगाव : महाराष्ट्र एकीकरण समितीच्या सर्वच उमेदवारांना मतदारांकडून भरघोस प्रतिसाद दिला जात आहे. आता या प्रचारासाठी राष्ट्रवादी काँग्रेसचे युवा नेते व कर्जत-जामखेडचे आमदार रोहित पवार बेळगावमध्ये दाखल होणार आहेत. 29 व 30 रोजी बेळगाव उत्तर, ग्रामीण, खानापूर व दक्षिण या मतदारसंघात त्यांच्या सभा, कार्यकर्त्यांबरोबर चर्चा होणार असल्याची माहिती उपलब्ध झाली आहे. काही महिन्यांपूर्वी त्यांनी बेळगावला धावती भेट देऊन आपण लवकरच पुन्हा बेळगावला येऊ, असे आश्वासन दिले होते. म. ए. समितीचे उमेदवार विजयी व्हावेत, यासाठी ते सर्व मतदारसंघात जाऊन प्रचारसभा घेणार आहेत. मध्यवर्ती म. ए. समितीच्या पदाधिकाऱ्यांनी राष्ट्रवादीचे प्रदेशाध्यक्ष जयंत पाटील, अध्यक्ष शरद पवार यांची भेट घेऊन प्रचारासाठी नेतेमंडळी पाठवून देण्याची विनंती केली होती. त्यानुसार रोहित पवार यांचा दौरा निश्चित केला आहे. 29 रोजी बेळगाव उत्तर मतदारसंघात सायंकाळी 7 वाजता पदयात्रा, त्यानंतर सभा होणार आहे. 30 रोजी सकाळी 8 वा. ग्रामीण मतदारसंघात रोड शो, 10 वाजता कोपरा सभा घेतली जाणार आहे. दुपारी 12 वा. खानापूर मतदारसंघात कार्यकर्त्यांच्या भेटी व कोपरा सभा होणार आहेत. सायंकाळी 5 वा. बेळगाव दक्षिण मतदारसंघात रोड शो व त्यानंतर सभा घेतली जाणार आहे.
