परीक्षेमुळेच पुलाचे काम लांबणीवर टाकण्याची विनंती केली : होडारकर

केपे : मुलांच्या दहावीच्या परीक्षा सुरू असल्याने होडार, कुडचडे येथील नवीन पुलाचे काम 15 दिवस पुढे ढकलावे अशी विनंती मी पायाभूत साधनसुविधा महामंडळाचे अध्यक्ष असलेले मुख्यमंत्री प्रमोद सावंत यांना केली होती. मात्र त्याचे कोणाला तरी वाईट वाटले व उलट प्रतिकिया आल्या, असे सांगून नगरसेवक बाळकृष्ण होडारकर यांनी कुडचडे येथे घेतलेल्या पत्रकार परिषदेत स्थानिक आमदार व सार्वजनिक बांधकाममंत्री नीलेश काब्राल यांना धारेवर धरण्याचा प्रयत्न केला. मुलांना पुस्तकांचे वाटप करणे व पुलाचा काय संबंध, असा सवाल होडारकर यांनी केला. मी कुडचडेतच जन्मालेलो आहे, मी कुडचडेचा जावई नाही, असा टोला त्यांनी हाणला. विकासाला माझा विरोध नाही. विकास झाला पाहिजे. पण हा विकास जनतेकरिता असला पाहिजे. मात्र येथे सगळ्याच गोष्टी दोन-दोन पाहायला मिळतात. दोन रवींद्र भवने, दोन क्रीडा संकुले व दोन पालिका इमारती. आंबेडकर सर्कलजवळ पाणी भरते. भूमिगत वीजवाहिन्या व भूमिगत गटार वाहिन्यांसाठी खोदून ठेवल्याने कुडचडे परिसर धूळमय झालेला आहे. त्यामुळे होणारे त्रास हाच विकास का, असा प्रश्न होडारकर यांनी केला. जी व्यक्ती घरातून सकाळी 10 वा. खाली येते, मग कार्यालयात जाते आणि त्यानंतर पणजीला जाते त्या व्यक्तीला कुडचडेच्या जनतेचे त्रास कसे काय दिसतील, असा प्रश्नही त्यांनी केला.