रास्तारोको करण्यास पोलिसांचा विरोध, रस्त्याच्या दुरुस्तीची मागणी
प्रतिनिधी /बेळगाव
बसुर्ते ते कोवाड रस्ता हा अत्यंत खराब झाला आहे. त्या रस्त्याची तातडीने दुरुस्ती करावी, या मागणीसाठी रास्ता रोको करण्यात येणार होता. मात्र पोलिसांनी रास्ता रोको करू नका, अशी विनंती केली. हवेतर जिल्हाधिकाऱयांना निवेदन द्या, असे त्यांनी सांगितले. त्यामुळे बसुर्ते, बेकिनकेरे परिसरातील नागरिकांनी जिल्हाधिकाऱयांना निवेदन देऊन रस्त्याच्या दुरुस्तीची मागणी केली आहे.
कर्नाटक आणि महाराष्ट्राला जोडणारा बसुर्ते ते कोवाडपर्यंतचा रस्ता आहे. मात्र या रस्त्याकडे कर्नाटक प्रशासनाचे दुर्लक्ष झाले आहे. हा रस्ता दुरुस्त करावा, अशी मागणी वारंवार करण्यात आली. तरीदेखील त्याकडे दुर्लक्ष करण्यात आले आहे. त्यामधून वाहने चालविणे कठीण झाले आहे. या समस्येविरोधात सोमवारी रास्ता रोको करण्यात येणार होता. मात्र पोलिसांनी रास्ता रोको करू नका, अशी विनंती केली आहे.
त्यानंतर बांधकाम संघटनेच्या माध्यमातून जिल्हाधिकाऱयांची भेट घेऊन सदर निवेदन देण्यात आले. तातडीने या रस्त्याची दुरुस्ती करा, अन्यथा लवकरच तीव्र आंदोलन केले जाईल, असा इशारा दिला आहे. यावेळी सुनील गावडे, अनिल शिंदे, बांधकाम संघटनेचे जिल्हाध्यक्ष ऍड. एन. आर. लातूर, दऱयाप्पा बिळगी, ऍड. रोहित लातूर, शीतल बेलावर यांच्यासह कामगार उपस्थित होते.
