मुंबई :
रिझर्व्ह बँकेच्या पतधोरण समितीची बैठक मंगळवार दि. 8 ऑगस्टपासून सुरू झाली असून 10 तारखेपर्यंत चालणार आहे. सदरच्या बैठकीत रेपोदर या खेपेसही जैसे थे ठेवला जाणार असल्याचा अंदाज वर्तवला जात आहे. भारतीय रिझर्व्ह बँकेचे गव्हर्नर शक्तिकांत दास यांच्या अध्यक्षतेखाली व्याजदर वाढीसंदर्भातील चर्चेला मंगळवारी सुरुवात झाली आहे. 6 सदस्यांच्या समितीच्या बैठकीमध्ये रेपोदर वाढीबाबत सविस्तर चर्चा केली जाणार असून सध्याची आर्थिक परिस्थिती व एकंदर महागाईचा कल या गोष्टी पाहून योग्य तो निर्णय घेतला जाणार आहे.
10 ऑगस्ट रोजी रेपोदर वाढीबाबतचा निर्णय गव्हर्नर शक्तिकांत दास यांच्याकडून घोषित केला जाणार आहे. तज्ञांच्या मते आर्थिक वृद्धीला प्रोत्साहन देण्यासाठी या खेपेलाही रेपोदरामध्ये कोणतीही वाढ केली जाणार नाही. मागच्या वर्षी मे महिन्यामध्ये रेपोदरात वाढीला सुरुवात झाली होती. फेब्रुवारीच्या पतधोरण समिती बैठकीमध्ये रेपो दर 6.25 टक्केवरून 6.50 टक्के इतका करण्यात आला. याआधीची पतधोरण समितीची बैठक 6 ते 8 जून या कालावधीत घेण्यात आली होती. ज्यात रेपोदर जैसे थे ठेवण्यात आला होता.
