कित्तूर चन्नम्मा चौकजवळील लोखंडी ग्रीलची दुरुस्ती करा

बेळगाव : शहराचा स्मार्ट सिटीमध्ये समावेश झाला. स्मार्ट सिटी अंतर्गत शहरातील रस्ते, पदपथ तयार करण्यात आले. मात्र काही दिवसांतच त्यांची दुरावस्था झाली आहे. कित्तूर चन्नम्मा चौकाजवळील पदपथाला लावण्यात आलेले लोखंडी ग्रील खराब होऊन कोसळले आहेत. त्याची दुरुस्ती करण्याकडे दुर्लक्ष करण्यात आले आहे. त्यामुळे अपघात घडण्याची शक्यता असून तातडीने त्याची दुरुस्ती करावी, अशी मागणी होत आहे. सतत गजबजलेल्या कित्तूर चन्नम्मा येथील पदपथाची दुरावस्था झाली आहे. ये-जा करताना या लोखंडी ग्रीलमुळे अडथळा निर्माण होत आहे. या ठिकाणीच रहदारी सिग्नल आहे. त्यामुळे वाहतूक कोंडी होत असते. तेव्हा तातडीने त्याची दुरुस्ती करावी, अशी मागणी होत आहे. पदपथावर असलेले काँक्रिट तसेच फरशीदेखील फुटली आहे. त्यामुळे ये-जा करणेही अवघड झाले असून लोखंडी ग्रीलची दुरुस्ती करणे महत्त्वाचे आहे. तेव्हा महापालिकेने  दुरुस्तीचे काम हाती घ्यावे, अशी मागणी करण्यात येत आहे.