सोनाली परब सावळ देसाई यांच्या कथासंग्रहाचे 28 रोजी प्रकाशन

मोरजी : उदयोन्मुख लेखिका सोनाली धीरज परब सावळ देसाई यांच्या ‘ओळख’ या पहिल्या कथासंग्रहाचे प्रकाशन रविवार 28 मे रोजी सायंकाळी 4:30 वाजता  हिरा फार्म, वझरी, पेडणे येथे होणार आहे. त्यावेळी सोनाली यांनी लिहिलेल,  अजित चव्हाण यांनी संगीतबद्ध केलेले आणि प्रसन्न प्रभू तेंडुलकर यांनी गायिलेले ‘कशासाठी? स्वत: साठी?’ हे गाणं रिलीज होणार आहे. प्रकाशन पूर्व सत्रात, ‘शाम ए गझल’ हा सुमधूर गझल गायनाचा कार्यक्रम होणार आहे. यात गोवा आणि महाराष्ट्रातील नामवंत कलाकार, प्रसन्न प्रभू तेंडुलकर (गायक), शुभम परब (गायक), शिवानंद दाभोळकर (संवादिनी), संकेत खलप (तबला), अजित चव्हाण (गिटार), साहिल पवार (कीबोर्ड) आणि  दत्तप्रसाद जोग (निवेदन) यांचा सहभाग असेल. गोवा मराठी अकादमीचे अध्यक्ष प्राचार्य अनिल सामंत, माजी केंद्रीय कायदामंत्री अॅड. रमाकांत खलप, आर्ट ऑफ लिविंग एक्सपर्ट आणि मॅनेजमेंट गुऊ प्रा. अविनाश वालावलकर आणि गोमंतक साहित्य सेवक मंडळाचे कोषाध्यक्ष राजमोहन शेटये यांच्या हस्ते कथासंग्रहाचे प्रकाशन होणार आहे. कार्यक्रमाचे सूत्रसंचालन परेश नाईक करतील. सोनाली यांनी गोवा फार्मसी कॉलेज पणजी येथून पदव्युत्तर शिक्षण घेतलेले असून सध्या त्या ळहग्म्पस् थ्aंदूदगे येथे कार्यरत आहेत. त्यांच्या कविता, कथा, विविध विषयांवरील ललित लेख या अगोदर स्थानिक वृत्तपत्रांतून, मासिक,  विशेषांक, दिवाळी अंक यातून प्रसिद्ध झाले आहेत. गोव्यातील विविध साहित्य संमेलनात त्या निमंत्रित कवयित्री आणि वक्ता म्हणून सहभागी झाल्या आहेत. त्यांच्या या पहिल्याच कथासंग्रहाला गोवा मराठी अकादमीने प्रकाशनपूर्व अनुदानाने गौरविले आहे. शब्द आणि स्वरांच्या या मैफीलिचा आनंद घेण्यासाठी सर्व साहित्य आणि संगीत प्रेमींनी या कार्यक्रमास उपस्थिती लावावी असे आवाहन कार्यक्रमाचे आयोजक धीरज शामसुंदर परब यांनी केले आहे.