माजी पंचायत समिती सभापती स्वप्नाली सावंत यांच्या खूनातील 3 संशयितांना सोमवारी न्यायालयापुढे हजर करण्यात येणार आहे. शहर पोलिसांकडून 11 सप्टेंबर रोजी संशयितांना अटक केल्यानंतर न्यायालयाने 19 सप्टेंबर पर्यंत पोलीस कोठडी सुनावली होती. सोमवारी ही पोलीस कोठडी संपत असल्याने पुन्हा एकदा संशयितांना न्यायालयापुढे हजर करण्यात येणार आहे यावेळी पोलीस कोठडीत वाढ करण्याची मागणी पोलिसांकडून होण्याची शक्यता आहे.
दिनांक 1 सप्टेंबर रोजी स्वप्नाली सावंत यांचा पती सुकांत सावंत व अन्य दोघांनी घराच्या किचनमध्ये गळा आवळून खून केला. तसेच यानंतर पुरावे नष्ट करण्यासाठी मृतदेह जाळून टाकला. तसेच त्याची राख व हाडे समुद्रात फेकून दिल्याचे समोर आले. याप्रकरणी पोलिसांनी पती सुकांत उर्पभाई गजानन सावंत (47), रूपेश उर्प छोटा भाईकमलाकर सावंत (43) व प्रमोद उर्प पम्या बाळू रावणंग (रा. सर्व सडामिऱ्या रत्नागिरी) यांना अटक केली. स्वप्नाली सावंत खून प्रकरणाचा तपास उपविभागिय पोलीस अधिकारी सदाशिव वाघमारे यांच्याकडून करण्यात येत आहे. खून प्रकरणात मृतदेह जाळून टाकण्यात आल्याने पोलिसांपुढे तपास काम करताना अडचणींना सामोरे जावे लागले होते. दरम्यान आठ दिवसांच्या पोलीस कोठडीत पोलिसांनी तपासामध्ये काय निष्पन्न केले हे न्यायालयापुढे ठेवावे लागणार आहे. तसेच पोलीस कोठडीत वाढ हवी असल्यास त्याची कारणे पोलिसांना न्यायालयापुढे सांगावी लागणार आहेत. मागील आठ दिवसांच्या तपासात पोलिसांना स्वप्नाली सावंत हिचा मृतदेह जाळून टाकल्यानंतर शिल्लक राहिलेली हाडे पोलिसांना आढळून आली होती. तसेच घरातील फोडून टाकण्यात आलेला कोबा व गुन्ह्यांसाठी वापरण्यात आलेली दोन वाहने पोलिसांकडून जप्त करण्यात आली आहेत. यामध्ये एक चारचाकी व दुचाकीचा समावेश आहे. या वाहनांची देखील फॉरेन्सिक तपासणी करण्यात येणार असल्याची माहिती समोर येत आहे. स्वप्नाली सावंत हिचा खून केल्यानंतर तीचा मोबाईल मुख्य आरोपी भाई सावंत याने जवळच्या विहीरीत टाकून दिला होता. ही विहीर पोलिसांकडून पंप लावून उपसण्याचे पयत्न झाल़े मात्र विहीरीला पाणी जास्त असल्याने पाणी उपसण्यात अडचणी निर्माण झाल्या होत्या. दरम्यान स्कूबाडायव्हिंगच्या मदतीने विहीरीच्या तळाशी असलेला मोबाईल शोधून काढण्यात आला. या मोबाईलच्या माध्यमातून काही महत्वाचे पुरावे हाती लागण्याची शक्यता आहे अशी माहिती पोलीस सूत्रांकडून देण्यात आली आहे.
