रायगड / प्रतिनिधी
रायगड जिल्ह्यातील माणगाव तालुक्यात असंलेल्या तिलोरे गावच्या हद्दीत मुंबई गोवा महामार्गावर टेम्पो ट्रॅव्हलर व कारमध्ये झालेल्या अपघातात एक जण ठार तर दोघे जखमी झाले. ही घटना सोमवारी (दि.4) मध्यरात्री 1.30 वाजण्याच्या सुमारास घडली. याप्रकरणी माणगाव पोलीस ठाण्यात अपघाताची नोंद करण्यात आली आहे.
पोलिसांनी दिलेल्या माहिती वरून अक्षय घोले ( रा. वणवशी, ता. दापोली) हा आपल्या टेम्पो ट्रॅव्हलर क्र. एमएच ४८ सीबी ३५७७ मधून मुंबई-गोवा महामार्गावरुन प्रवास करीत होता. यावेळी तिलोरे गावच्या हद्दीत आल्यावर मुंबईकडून येणार्‍या वॅगनर कार क्र. एमएच ४७ एन ३९१९ वरील चालकाचा ताबा सुटल्याने कारने टेम्पोला जोरदार धडक दिली. या अपघातात कार चालक सुरेश परब (रा. मालाड, मुंबई) हा जखमी झाला असून कारमध्ये मागे बसलेल्या साधना मेस्त्री यांना किरकोळ दुखापत झाली आहे. तर त्याच गाडीत बाजूला बसलेले शशिकांत पांडुरंग पांचाळ यांचा मृत्यू झाला. पोलिसांनी कार चालकावर गुन्हा दाखल केला असून माणगाव पोलीस ठाण्यात अपघाताची नोंद झाली आहे.
