रमाकांत कोंडुस्कर यांचा झंझावात

बेळगाव : दक्षिण मतदारसंघातील म. ए. समितीचे उमेदवार रमाकांत कोंडुस्कर यांनी प्रचारामध्ये आघाडी घेतली. अनगोळच्या झंझावातानंतर तर इतिहासच घडविला. या झंझावातामुळे दक्षिण मतदारसंघातील संपूर्ण चित्रच पालटले असून रमाकांत कोंडुस्कर यांचा विजय मोठ्या मताधिक्याने होणार, हे आता निश्चित आहे. शिवसेनेचे नेते खासदार संजय राऊत, राष्ट्रवादी काँग्रेसचे युवानेते रोहित पवार आणि रोहित पाटील यांच्या सभा आणि रोड शोने शहरासह संपूर्ण ग्रामीण भाग एकवटला. शहरामध्ये प्रचाराला सर्वत्र उत्स्फूर्त प्रतिसाद मिळाला. शेवटच्या टप्प्यात राष्ट्रवादीचे नेते आमदार जयंत पाटील यांनीही पदयात्रा काढली. त्यामुळे टिळकवाडी, हिंदवाडी, भाग्यनगर या परिसरातून त्यांना उत्स्फूर्त प्रतिसाद मिळाला. म. ए. समितीच्या झेंड्याखाली जनता एकवटली आहे. रमाकांत कोंडुस्कर यांना विजयी करण्याचा निर्धार केला आहे. येळ्ळूरपासून प्रचाराला रमाकांत कोंडुस्कर यांनी सुरुवात केली. संपूर्ण येळ्ळूर गाव एकवटला आहे. येळ्ळूर गावामध्ये गल्लोगल्ली त्यांना पाठिंबा मिळाला. यामुळे राष्ट्रीय पक्षांच्या उमेदवारांचे धाबे दणाणले आहेत. येळ्ळूर गावाबरोबरच मच्छे, पिरनवाडी, खादरवाडी, मजगाव या गावांतून 100 टक्के पाठिंबा मिळाला. संपूर्ण परिसर ढवळून निघाला आहे. कार्यकर्ते स्वयंस्फूर्तीने घरोघरी जाऊन प्रचार करत आहेत. अनेक ठिकाणी रमाकांत कोंडुस्कर यांना मतदान करण्यासाठी शपथ घेण्यात आली.  कोंडुस्कर यांना महिलावर्गातून जाहीर पाठिंबा देण्यात आला आहे. राष्ट्रीय पक्षांच्या उमेदवारांना जनता गोळा करण्यासाठी पैसे खर्च करावे लागत आहेत. मात्र या उलट कोंडुस्कर यांना रक्कम देऊन आर्थिक मदत अनेक ठिकाणी करण्यात आली. कार्यकर्ते प्रत्येक मतदाराच्या घरोघरी जाऊन रमाकांत यांना आपले बहुमोल मत देऊन विजयी करावे, असे आवाहन करण्यात येत आहे. याला सर्वत्र प्रतिसाद मिळत आहे.