राज्यात आज पावसाचा जोर वाढण्याची शक्यता

पणजी : पावसाने सोमवारी थोडी उसंत घेतली असली तरी आज मंगळवारपासून त्याचा जोर पुन्हा वाढण्याची शक्यता आहे. बुधवारी गोव्यात मुसळधार पावसाचा इशारा देत हवामान खात्याने त्यादिवशी ऑरेंज अर्लट जारी केला आहे. राज्यात आतापर्यंत सरासरी 115 इंच पावसाची नोंद झाली आहे. सोमवारी किंचित उसंत घेतलेला पाऊस पुढील दोन दिवसांमध्ये अधिक आक्रमक होण्याची शक्यता आहे. पुढील काही दिवसांकरिता हवामान खात्याने यलो ऑरेंज अलर्ट केला आहे. उद्या बुधवारी गोव्यात ऑरेंज अलर्ट आहे. या दरम्यान मुसळधार पावसाचा इशारा देखील हवामान खात्याने दिला आहे. गेल्या 24 तासांमध्ये मान्सून नियमित आहे मात्र बंगालच्या खाडीत कमी दाबाचे क्षेत्र निर्माण होत आहे व त्याचा फटका गोव्याला बसणार आहे. गेल्या 24 तासांमध्ये सर्वाधिक दीड इंच पाऊस सांगे येथे पडला. फोंडा, धारबांदोडा, पेडणे, जुने गोवे, पणजी येथे प्रत्येकी अर्ध्या इंच पावसाची नोंद झाली. वाळपईत 1 सें.मी., सांखळी, म्हापसा काणकोण, मुरगाव, दाबोळी या भागात प्रत्येकी 1.सें.मी पेक्षाही कमी पावसाची नोंद झाली. दरम्यान, अर्धा इंचाच्या पावसामुळे यंदाच्या मोसमातील पाऊस 115 इंच झालेला आहे. सरासरीच्या तुलनेत तो 6.8 टक्के जास्त आहे.