रेल टू एअर बससेवा पूर्ववत सुरू

बेळगाव : विमान प्रवाशांच्या सोयीसाठी सुरू करण्यात आलेली रेल टू एअर बससेवा मध्यंतरी प्रवाशांच्या प्रतिसादाअभावी बंद होती. परंतु आता ही बस पुन्हा सुरू करण्यात आली आहे. पुढील महिन्यात बेळगाव-दिल्ली विमानसेवा सुरू होणार असल्याने प्रवाशांची गैरसोय होऊ नये यासाठी बससेवा सुरू करण्यात आली आहे. विमान प्रवाशांची संख्या वाढत गेल्याने बेळगाव शहरापासून सांबरा येथील विमानतळापर्यंत बससेवेची मागणी करण्यात येत होती. शहरापासून विमानतळ 10 ते 11 किलोमीटर अंतरावर असल्याने खासगी टॅक्सी अथवा रिक्षाचे भाडे अधिक होत होते. त्यामुळे मागील वर्षी रेल टू एअर बससेवा सुरू करण्यात आली. बेळगाव रेल्वेस्थानकापासून सांबरा येथील विमानतळापर्यंत सेवा सुरू करण्यात आली. परंतु विमानाची वेळ व बसची वेळ जुळत नसल्याने प्रवाशांचा प्रतिसाद कमी होत गेला. प्रवाशांमधून मागणी होत असल्याने हुबळीच्या धर्तीवर बेळगावमध्येही रेल टू एअर बससेवा सुरू करण्यात आली आहे. यामुळे रेल्वेस्थानक, गोगटे सर्कल, धर्मवीर संभाजी चौक, राणी चन्नम्मा चौक, आरटीओ सर्कल, मध्यवर्ती बसस्थानक येथून विमानतळापर्यंत पोहचणे शक्य होणार आहे. तसेच विमानांच्या वेळापत्रकाप्रमणेच बसचे वेळापत्रक ठरविले जाणार असल्याची माहिती उपलब्ध झाली आहे. त्यामुळे प्रवाशांच्या सोयीसाठी सुरू केलेल्या या सेवेला प्रवाशांनीही उत्तम प्रतिसाद द्यावा, असे आवाहन करण्यात आले आहे.