श्री महिला सोसायटीतर्फे रविवारी राहुल देशपांडे ‘कलेक्टिव्ह’ कार्यक्रम

बेळगाव : श्री महिला व्रेडिट सौहार्द सहकारी लि. च्या वतीने महिला दिनाच्या निमित्ताने प्रख्यात शास्त्रीय गायक, राष्ट्रीय पुरस्कार विजेते राहुल देशपांडे ‘कलेक्टिव्ह’ या कार्यक्रमाचे आयोजन करण्यात आले आहे. रविवार दि 10 मार्च रोजी हिंडलगा गणपती जवळील गणाधीश लॉन्स येथे सायंकाळी 6 वाजता हा कार्यक्रम होईल. राहुल देशपांडे शास्त्रीय आणि फ्युजन संगीत सादर करणार आहेत. ‘मी वसंतराव’ या चित्रपटातील भूमिकेसाठी त्यांना राष्ट्रीय चित्रपट पुरस्कार मिळाला आहे. प्रसिद्ध शास्त्रीय गायक कै. वसंतराव देशपांडे यांचे ते नातू आहेत. राहुल देशपांडे यांनी ‘सा रे ग म प-लिटिल चॅम्प्स् आणि संगीत सम्राट पर्व 2’ या शोचे परीक्षक म्हणून काम केले आहे. ‘कट्यार काळजात घुसली’ या संगीत नाटकाच्या पुन: शुभारंभातील त्यांच्या कामाचे कौतुक झाले. कट्यार काळजात घुसली या नाटकात राहुल देशपांडे यांनी ‘खाँसाहेब आफताब हुसेन बरेलीवाले’ ही भूमिका साकारली होती. कट्यारसह संगीत संशयकल्लोळ, संगीत मानापमान आणि संगीत सौभद्र या गाजलेल्या संगीत नाटकातही त्यांनी काम केले आहे. सदर कार्यक्रमाच्या प्रवेशिका श्री महिला व्रेडिट सौहार्द सहकारी लि. च्या सर्व शाखांतून उपलब्ध आहेत. एका प्रवेशिकेवर एका व्यक्तीस प्रवेश दिला जाईल. प्रवेशिका दाखवून आत प्रवेश दिला जाईल. याची संगीतप्रेमींनी नोंद घ्यावी, असे आयोजकांतर्फे कळविण्यात आले आहे. श्री महिला व्रेडिट सौहार्द सहकारी लि.च्या वतीने नवीन ‘सुवर्ण कर्ज’ योजना सुरू होणार आहे. या सुवर्ण योजनेचे अनावरण या समारंभात होणार आहे.