राडुकानू तिसऱया फेरीत, ओसाका, मुगुरूझा पराभूत

माद्रीद (स्पेन)

डब्ल्यूटीए टूरवरील येथे सुरू असलेल्या माद्रीद खुल्या महिलांच्या आंतरराष्ट्रीय टेनिस स्पर्धेत इमा राडुकानूने एकेरीची तिसरी फेरी गाठताना मार्टा कोस्टय़ुकचा पराभव केंला. त्याचप्रमाणे या स्पर्धेत जपानची नाओमी ओसाका व स्पेनची गार्बेनी मुगुरूझा यांचे आव्हान दुसऱया फेरीत समाप्त झाले. दुसऱया फेरीतील सामन्यात नवव्या मानांकित राडुकानूने युक्रेनच्या मार्टा कोस्टय़ुकचा 6-2, 6-1 असा पराभव करत तिसऱया फेरीत स्थान मिळविले. गेल्या उन्हाळी मोसमात राडुकानूने अमेरिकन ग्रॅण्ड स्लॅम स्पर्धा जिंकली होती. दुसऱया एका सामन्यात टिचमनने लैला फर्नांडिसवर 6-4, 6-4 अशी मात केली. स्पेनच्या सारा सोरीबेस टोर्मोने जपानच्या माजी टॉप सीडेड नाओमी ओसाकाला 6-3, 6-1 अशा सरळ सेटस्मध्ये पराभवाचा धक्का देत पुढील फेरीत स्थान मिळविले. हा सामना 90 मिनिटे चालला होता. दुसऱया एका सामन्यात कॅसेटकिनाने ग्रीसच्या चौथ्या मानांकित सॅकेरीचा 3-6, 6-3, 6-1, युक्रेनच्या कॅलिनीनाने स्पेनच्या मुगुरूझाचा 6-3, 6-0, अँड्रेस्क्यूने डॅनिली कॉलिन्सचा 6-1, 6-1 असा पराभव करत पुढील फेरीत प्रवेश मिळविला.