चौगुले यांना निवडून आणण्याचा निर्धार : गल्लोगल्ली प्रचारफेरी, मतदारांच्या गाठीभेटी
वार्ताहर /किणये
महाराष्ट्र एकीकरण समितीचे ग्रामीणचे अधिकृत उमेदवार आर. एम. चौगुले यांना जानेवाडी गावातून पाठिंबा दर्शविण्यात आला आहे. गावात चौगुले यांची भव्य प्रचारफेरी काढण्यात आली. या प्रचारफेरीमध्ये कार्यकर्ते व महिला मोठ्या संख्येने सहभागी झाल्या होत्या. गावातील सातेरी माउली मंदिर येथून प्रचारफेरीला सुरुवात करण्यात आली. या फेरीत बेळगाव, कारवार, निपाणी, बिदर भालकीसह संयुक्त महाराष्ट्र झालाच पाहिजे, अशा घोषणा कार्यकर्त्यांनी दिल्या. यामुळे अवघा परिसर दुमदुमला होता. गावातील समितीचे प्रमुख मंडळी, कार्यकर्ते व महिला यांनी घरोघरी जाऊन मतदारांच्या गाठीभेटी घेतल्या व महाराष्ट्र एकीकरण समितीचे उमेदवार आर. एम. चौगुले यांना मतदान करा, असे आवाहनही केले. पश्चिम भागातील जानेवाडी गाव हे महाराष्ट्र एकीकरण समितीचा बालेकिल्ला म्हणून ओळखले जाते. ही परंपरा सर्वांनी अबाधीत ठेवण्यासाठी प्रयत्न करावेत. या निवडणुकीतही महाराष्ट्र एकीकरण समितीचे उमेदवार चौगुले यांना भरघोस मतदान करा, असे यावेळी प्रमुख मान्यवरांनी सांगितले. सीमाप्रश्नाच्या लढ्यासाठी या भागातील अनेक कार्यकर्त्यांनी लाठ्या खालेल्या आहेत. तुरुंगवास भोगलेला आहे. बरीचशी वडीलधारी मंडळी सीमासत्याग्रही म्हणूनही आहेत. त्यांची आजवर एकच तळमळ आहे की हा भाग महाराष्ट्रात सामील व्हावा. त्यासाठी आपण सर्वांनी मिळून महाराष्ट्र एकीकरण समितीच्या उमेदवाराला निवडून देण्यासाठी प्रयत्न करूया, असेही काही कार्यकर्त्यांनी बोलताना सांगितले. गावातील सर्व गल्ल्यांमध्ये प्रचारफेरी काढण्यात आली. यावेळी तरुणांमध्ये एक वेगळाच उत्साह दिसून आला. गावच्या वतीने आर.एम. चौगुले यांना पूर्णपणे पाठिंबा दर्शविण्यात आला.
