कोळंब सरकारी विद्यालयात जनभागीदारी उपक्रम

सांगे : सरकारी विद्यालय, कोळंब व शैक्षणिक विभाग यांच्या संयुक्त विद्यमाने ‘जनभागीदारी’ उपक्रमाचे नुकतेच आयोजन करण्यात आले. या उपक्रमांतर्गत ‘जी-20 शिखर परिषद’ व ‘नवीन शैक्षणिक धोरण, 2020’ याविषयीची माहिती पालकांना देण्यात आली. प्रमुख अतिथी म्हणून गावच्या पंच सानिया वेळीप व पालक-शिक्षक संघाचे अध्यक्ष मंगेश देविदास उपस्थित होते. प्रास्ताविक मुख्याध्यापिका वेनिझा कार्दोज यांनी केले. ज्येष्ठ शिक्षक राम करमली यांनी नवीन शिक्षण धोरणावर भाष्य केले आणि शाळेमध्ये नववी व दहावी इयत्तांसाठी ऑटोमोबाईल, रिटेल हे विषय समाविष्ट केल्यामुळे मुलांना आत्मनिर्भर बनण्याचे प्रशिक्षण मिळेल, असे सांगितले. तसेच शिक्षक स्वप्नेश गावकर यांनी ‘जी-20’वर भाष्य केले. सातवीच्या विद्यार्थ्यांनी नवीन शैक्षणिक धोरणावर प्रहसन सादर केले, तर पंच वेळीप यांच्या हस्ते ‘डिजिटल इंडिया’ या भित्तीपत्रकाचे अनावरण करण्यात आले. शिक्षक करमली यांनी सूत्रसंचालन केले.