आयटकतर्फे आझाद मैदानावर निदर्शने

पणजी : अखिल भारतीय ट्रेड युनियन काँग्रेसच्या (आयटक) गोवा राज्य समितीतर्फे विविध मागण्यांसाठी पणजीतील आझाद मैदानावर धरणे निदर्शने करण्यात आली. विधानसभा अधिवेशनाचे लक्ष वेधणे हा त्यामागील हेतू होता. किमान वेतनात सुधारणा करावी हि त्यांची प्रमुख मागणी होती. अकुशल कामगार रु. 750 प्रति दिन निमकुशल रु. 825 प्रति दिन, कुशल रु. 910 प्रतिदिन तर उच्च कुशल रु. 1000 प्रतिदिन अशी किमान वेतनात सुधारणा करावी अशी मागणी करण्यात आली. कदंब परिवहन महामंडळाच्या कर्मचारी वर्गास 7 वा वेतन आयोग लागू करण्यात यावा, नदी परिवहन खात्यातील कर्मचाऱ्यांना जादा कामाचे वेतन देण्यात यावे, पंचायत कर्मचाऱ्यांना 7 वा. वेतन आयोग देण्यात यावा, सार्वजनिक बांधकाम खात्यातील कंत्राटी कामगारांना कायम सेवेत समावून घ्यावे. जे 20 ते 25 वर्षे कंत्राटी सेवेत आहेत, त्यांना समान काम – समान वेदन देण्यात यावे तसेच बोनसचा लाभ मिळावा अशा विविध मागण्यांसाठी घोषणाबाजी करण्यात आली. वीज खात्यातील कंत्राटी कामगारांना नियमित करावे, अंगणवाडी सेविकांना समान काम, समान वेतन द्यावे, प्री-प्रायमरी हेल्पर्सचे वेतन वाढवावे, वेर्णा वसाहतीमधील औषध कंपन्यातील कामगारांची सतावणूक पिळवणूक थांबवावी अशा मागण्यांचे निवेदन सरकारला सादर करण्यात आले. आयटकचे सरचिटणीस ख्रिस्तोफर फेन्सेका यांनी आंदोलनाचे नेतृव केले. त्यात कामगार, कर्मचारी यांनी मोठ्यासंख्येने भाग घेतला.