पोलीस स्थानकासमोर धरणे

बेळगाव : मारहाण प्रकरणातील आरोपींची सुटका का केली? अशी विचारणा करीत बुधवारी हिरेबागेवाडी पोलीस स्थानकासमोर नागरिकांनी धरणे धरले. मात्र, आरोपींची सुटका आम्ही केली नाही, त्यांची जामिनावर मुक्तता झाली आहे. याविषयी पोलीस अधिकाऱ्यांनी त्यांना पटवून दिले. 1 डिसेंबर रोजी हिरेबागेवाडी पोलीस स्थानकात मारहाण प्रकरणी एफआयआर दाखल करण्यात आला होता. प्रज्ज्वल इंचल (वय 22) याला मारहाण झाली होती. शिवानंद अंकलगी व बसनगौडा मधुबरमण्णवर या दोघा जणांवर एफआयआर दाखल करण्यात आले होते. दोघा जणांना अटकही करण्यात आली होती. त्यांची जामिनावर मुक्तता केल्यानंतर गावकऱ्यांनी पोलीस स्थानकासमोर धरणे धरले. पोलीस निरीक्षक आर. आर. पाटील यांनी त्यांची मनधरणी केली.