उंब्रज पोलिसांनी चौघांना केली अटक, पाच दिवस पोलीस कोठडी
प्रतिनिधी/ उंब्रज
रिव्हॉल्वरचा धाक दाखवून मुलाने वडिलांना राहत्या घरी जबर मारहाण करत जिवे मारण्याची धमकी देऊन जबरदस्तीने कुलमुखत्यारपत्र व बेकायदेशीर बक्षीसपत्र करून घेतले असल्याची फिर्याद उंब्रज पोलीस ठाण्यात दाखल झाली आहे. याप्रकरणी सून, नातू, नातसून यांच्यासह अन्य पाच जणांवर उंब्रज पोलीस ठाण्यात गुन्हा दाखल करण्यात आला आहे. पोलिसांनी चार जणांना अटक केली असून संशयितांना न्यायालयाने पाच दिवसांची पोलीस कोठडी सुनावली आहे.
मुलगा नितीन प्रल्हाद घुटे, सून सौ. वंदना नितीन घुटे, नातू शुभम नितीन घुटे व नातसून सौ. टिना शुभम घुटे (सर्व रा. उंब्रज), उत्तम आनंदा केंजळे (रा. चरेगाव, ता. कराड), कल्याण खामकर (रा. कारंडवाडी, ता. कराड), गणेश बबन पोटेकर (रा. मुंढे, ता. कराड), संदीप हणमटे पोतले (रा. मुंढे, ता. कराड), दिगंबर रघुनाथ माळी (रा. मलकापूर) अशी गुन्हा दाखल झालेल्या संशयितांची नावे आहेत. याप्रकरणी प्रल्हाद गणपती घुटे (वय 83, रा. उंब्रज) यांनी उंब्रज पोलीस ठाण्यात फिर्याद दाखल केली आहे.
पोलिसांकडून मिळालेली माहिती अशी, प्रल्हाद घुटे यांनी दिलेल्या फिर्यादीनुसार स्वकष्टार्जित नितीराज या बंगल्यात राहण्यास असून, या ठिकाणी मुलगा नितीन हा वारंवार ‘तुमची सर्व प्रॉपर्टी माझ्या नावावर करा’ असा तगादा लावत होता. सदर मिळकती हडपण्याच्या उद्देशाने तसेच सर्व मिळकती बक्षीसपत्राने द्याव्यात, या हेतूने मुलगा नितीन, सून वंदना, नातू शुभम, नातसून टिना यांनी मला माझ्या बंगल्यातील पहिल्या मजल्यावरील रुममध्ये माझ्या इच्छेविरूद्ध डांबून ठेवले व मला रुमच्या बाहेर पडण्यास बंदी केली. तसेच माझ्या रुमममध्ये कोणत्याही कर्मचाऱयास येण्यास सक्त मनाई केली. माझी मुलगी, जावई व नातेवाईक यांना कोणत्याही प्रकारे भेटण्यास दिले नाही. माझ्यावर रोज दबाव टाकून मानसिक खच्चीकरण करून दमदाटी करून उपाशी ठेवले. 12 सप्टेंबर 2022 ते 19 ऑक्टोबर 2022 अखेर या चौघांनी वारंवार माझ्या नावावर असणाऱया प्रॉपर्टीचे बक्षीसपत्र करून देण्यासाठी दमदाटी करत होते. त्यावेळी नितीन रोज रिव्हॉल्वर घेऊन दमदाटी करत होता. नितीनने माझ्यासमोर रिव्हॉल्वर ठेवून जिवे मारण्याची धमकी दिली. लाथाबुक्क्यांनी मारहाण केली. जिवे मारण्याची धमकी देऊन ‘मी जिथे सांगेन त्या ठिकाणी सही व अंगठा करायचा’ असा दबाव टाकला. चारचाकी गाडीमध्ये जबरदस्तीने घालून 22 सप्टेंबर व 3 ऑक्टोबर रोजी कराड येथील रजिस्टर नोंदणी ऑफिसमध्ये नेले. तेथे नितीनचा मॅनेजर उत्तम अनंत केंजळे, गणेश बबन पोटेकर, संदीप हणमंत पोतले, दिगंबर रघुनाथ माळी यांनी ‘आम्ही दस्त करतेवेळी साक्षीदार आहोत. नितीन म्हणतोय तसे करून टाका. नाहीतर तुम्हाला जड जाईल’ अशी दमदाटी केली. त्यावेळी घाई गडबडीत बऱयाच कागदावर माझ्या स्वाक्षऱया व अंगठा घेऊन मला मारहाण केली. कुलमुखत्यारपत्र नितीनने स्वतःच्या नावे व बक्षीसपत्र नातू शुभम घुटे याच्या नावे बेकायदेशीर पद्धतीने करून घेतले असल्याचे फिर्यादीत नमूद करण्यात आले आहे.
12 सप्टेंबर रोजी विश्वासाचा गैरफायदा घेऊन माझ्या परवानगीशिवाय माझ्या ऑफिसमध्ये येऊन उत्तम आनंदा केजळे, शुभम घुटे व ड्रायव्हर कल्याण खामकर यांनी माझ्या संपूर्ण प्रॉपटीचे ओरिजीनल फाईल, आधारकार्ड, पॅनकार्ड, मतदान कार्ड, चेकबुक, पासपोर्ट साईजचे फोटो या वस्तू नेल्या असल्याचे फिर्यादीत नमूद करण्यात आले आहे.
चारही जणांना पाच दिवसांची पोलीस कोठडी
या प्रकरणी नितीन प्रल्हाद घुटे (वय 53), शुभम नितीन घुटे (वय 26), उत्तम आनंदा केंजळे (वय 55, रा. चरेगाव), कल्याण नंदकुमार खामकर (वय 37, रा. कारंडवाडी, ता. कडेगाव, जि. सांगली) यांना 30 रोजी दुपारनंतर अटक करण्यात आली होती. त्यांना 31 रोजी कराड येथील प्रथम वर्ग न्यायदंडाधिकारी न्यायालयात हजर केले असता चारही जणांना पाच दिवसांची पोलीस कोठडी देण्यात आली आहे. तपास सहाय्यक अजय गोरड यांच्या मार्गदर्शनाखाली पोलीस उपनिरीक्षक आबा जगदाळे करीत आहेत.
