प्रशांत बांदेकर यांची राष्ट्रीय महामार्ग प्राधिकरणाकडे मागणी
वार्ताहर / बांदा
बांदा येथील राष्ट्रीय महामार्गालगत वाफोली मार्गावर कट्टा कॉर्नर जवळील नाल्यात पावसाच्या पाण्याचा निचरा करण्यासाठी टाकलेला पाईप लहान असल्याने पाण्याचा योग्य प्रकारे निचरा होत नव्हता. परिणामी रस्त्यावर पाणी साचत असे मात्र सदरील समस्या लक्षात घेत ग्रामपंचायत सदस्य प्रशांत बांदेकर यांनी सदरील जागी मोठा पाईप बसवून देण्याची मागणी राष्ट्रीय महामार्ग प्राधिकरणाकडे लेखी स्वरपात केली आहे.
बांदा कट्टा कॉर्नर येथे सध्या उड्डाणपुलाचे काम युध्दपातळीवर सुरू आहे. बांदा -वाफोली रस्त्याच्या बाजूला एक नाला असून पावसाळयात पाण्याचा निचरा याच नाल्यातून होत असतो. परंतू या नाल्यासाठी वापरण्यात आलेले पाईप खूपच लहान असल्याने एक दोन तास जरी मोठा पाऊस पडला तरी या नाल्यातून पाणी योग्य प्रमाणात जात नाही परीणामी पाणी रस्त्यावर येते व वाहतूक पूर्णपणे बंद होते. शिवाय आजूबाजूच्या दुकानांचे सुध्दा नुकसान होते. सदर काम हे काही वर्षापूर्वी राष्ट्रीय महामार्गाच्या अंतर्गत करण्यात आले होते. आता राष्ट्रीय महामार्गाकडूनच याठिकाणी उड्डाण पूलाचे काम सुरु आहे त्यामुळे ग्रामपंचायत सदस्य श्री.प्रशांत बांदेकर यांनी याठिकाणी पाण्याचा योग्य निचरा होण्यासाठी मोठे पाईप टाकण्यात यावे अशी मागणी ग्रामस्थांच्या वतीने राष्ट्रीय महामार्गाकडे केली आहे.
