ऑनलाईन टीम / तरुण भारत :
पुण्यातून एक धक्कादायक घटना समोर आली आहे. उसने घेतलेले पैसे परत न दिल्याने खासगी सावकाराने त्या व्यक्तीला समोर बसवून त्याच्या पत्नीवर बलात्कार केला. तसेच या संपूर्ण प्रकाराचा व्हिडिओ तयार करुन त्याने तो सोशल मीडियावर व्हायरल केला. याप्रकरणी पोलिसांनी आरोपीला अटक केली आहे.
इम्तियाज हसीन शेख (वय 47) असे अटक केलेल्या खासगी सावकाराचे नाव आहे. याप्रकरणी 34 वर्षीय पीडित महिलेने हडपसर पोलीस ठाण्यात तक्रार दिली आहे.
पोलिसांनी दिलेल्या माहितीनुसार, पीडित महिलेच्या पतीने आरोपी शेख याच्याकडून उसने पैसे घेतले होते. मात्र, उसने घेतलेले पैसे महिलेचा पती परत करु शकला नाही. त्यामुळे आरोपीने फिर्यादी महिला आणि तिच्या पतीला जीवे मारण्याची धमकी देत हडपसर येथील म्हाडा कॉलनीत बोलावून घेतले. त्यानंतर फिर्यादी महिलेच्या पतीला चाकूचा धाक दाखवत महिलेवर पतीसमोरच बलात्कार केला. आरोपी एवढय़ावरच थांबला नाही. तर त्याने या सर्व प्रकाराचा व्हिडिओ तयार केला. फेब्रुवारी 2023 मध्ये ही घटना घडली होती. त्यानंतर व्हिडिओ व्हायरल करण्याची धमकी देत महिलेला पुन्हा शरीरसुखाची मागणी करण्यात आली. महिलेने नकार दिला असता आरोपीने तो व्हिडिओ सोशल मीडियावर व्हायरल केला.
व्हिडिओ सोशल मीडियावर व्हायरल झाल्याचे समजताच महिलेने हडपसर पोलीस ठाणे गाठत तक्रार नोंदवली. महिलेच्या तक्रारीनंतर हडपसर पोलिसांनी गुन्हा दाखल करत आरोपी इम्तियाज शेखला अटक केली. हडपसर पोलीस या प्रकरणाचा अधिक तपास करत आहेत.
