पंतप्रधानांचे रथातून होणार स्टेडियमवर आगमन

मडगाव : राष्ट्रीय क्रीडा स्पर्धेच्या उद्घाटनासाठी पंतप्रधान नरेंद्र मोदी दाबोळी विमानतळावरून रस्ता मार्गेच फातोर्ड्यात येणार असल्याची माहिती मुख्यमंत्री डॉ. प्रमोद सावंत यांनी दिली. उद्घाटन सोहळा सायंकाळी उशिरा होत असल्याने पंतप्रधान हेलिकॉप्टरद्वारे आणण्याचा धोका पत्करला जाणार नसल्याचे मुख्यमंत्र्यांनी स्पष्ट केले. उद्घाटन समारंभासाठी पंतप्रधान नरेंद्र मोदी यांचे दाबोळी विमानतळावर आगमन होईल, त्यानंतर त्यांना हेलिकॉप्टरद्वारे थेट फातोर्डा स्टेडियमवर आणले जाणार असल्याचे यापूर्वी घोषित करण्यात आले होते. त्यासाठी हेलिपॅड उभारले जाणार असल्याचे सांगण्यात आले होते. मात्र, उद्घाटन सोहळा सायंकाळी उशिरा होत असल्याने हेलिकॉप्टरचा वापर न करण्याचा निर्णय घेण्यात आला आहे. दाबोळी विमानतळावरून पंतप्रधान नरेंद्र मोदी केवळ 20 ते 25 मिनिटांत फातोर्ड्यात पोहोचणार आहेत. फातोर्ड्यात आल्यावर रथातून त्यांचे मैदानात आगमन होणार आहे. सुरक्षेच्या दृष्टिकोनातून फातोर्डा मैदानाच्या जवळ असलेल्या सर्व इमारतींवर पडदे लावले जाणार आहेत.