शिर्डी, पुणे / प्रतिनिधी :
पक्ष बदलणे तसेच आपला पक्ष बदलून वेगळे होऊन मुख्यमंत्री होणे गैर नाही. पण ज्या घरात वाढलो, ते घर उद्ध्वस्त करणे ही बेईमानी आहे. त्यामुळे सत्ताधाऱ्यांच्या आमिषाला बळी पडू नका, असा सावधगिरीचा सल्ला राष्ट्रवादीचे नेते अजित पवार (Ajit Pawar) यांनी दिला. आगामी स्थानिक स्वराज्य संस्थांच्या निवडणुकांमध्ये स्वबळावर लढण्याची तयारी करा. आपली ताकत असेल, तर मित्रपक्ष चर्चा करतील, असे आवाहनही पवार यांनी या वेळी कार्यकर्त्यांना केले.
शिर्डी येथील पक्षाच्या अधिवेशनात पवार बोलत होते. राष्ट्रवादीचे प्रदेशाध्यक्ष जयंत पाटील यांच्यासह अन्य नेते या वेळी उपस्थित होते. पवार म्हणाले, सत्ताधारी आपल्या पक्षातील लोकांनाही आमिष दाखवत आहेत, आपल्या लोकांनाही काही सांगत आहेत. पण त्यांच्या आश्वासनाला बळी पडू नका. जे पक्ष सोडून गेले त्यांना आता पश्चाताप होत आहे. त्यांना आपल्या चुकीची जाणीव होत आहे. ज्या घरात वाढलो, ते घर उद्ध्वस्त करणे योग्य नाही. शिवसेनेबाबत जे घडले, पक्षाचे नाव गेले, हे महाराष्ट्रातील जनतेला आवडलेले नाही, याकडेही त्यांनी लक्ष वेधले.
आगामी स्थानिक स्वराज्य संस्थांच्या निवडणुकात आघाडीची वाट पाहत बसू नका. ती लवकरच होईल. मात्र तुम्ही कामाला लागा. आघाडीची वाट पाहत बसण्यापेक्षा स्वबळावर लढण्याची तयारी करा. आपली ताकद स्थानिक पातळीवर दिसली, तरच मित्र पक्ष आपल्यासोबत चर्चा करायला येतील. महाविकास आघाडी सत्तेत कशी येईल, हे बघितले पाहिजे. त्यासाठी पक्ष मजबूत केला पाहिजे. यासाठी कार्यकर्त्यांनी काम केले पाहिजे.
अधिक वाचा : मलिकांना धक्का; ईडी घेणार 8 मालमत्तांचा ताबा
आपल्याला विधान परिषदेच्या पाच जागा निवडून आणायच्या आहेत. यासाठी आतापासून कार्यकर्त्यांनी कामाला लागावे. फेब्रुवारी 2023 मध्ये विधान परिषदेच्या पाच जागांसाठी निवडणुका होत आहेत. औरंगाबाद शिक्षक, कोकण शिक्षक, नाशिक पदवीधर, नागपूर शिक्षक, अमरावती पदवीधर या जागांसाठी निवडणुका पार पडणार आहेत. आपला नागपूर आणि अमरावती येथे आमदार नाही. आपल्याला या जागा मिळवायच्या आहेत. औरंगाबाद राष्ट्रवादीकडे आहे. कोकण शिक्षक मतदारसंघाची जागा मित्र पक्षाकडे आहे. मित्र पक्ष काँग्रेसकडे नाशिकची जागा आहे. अमरावतीची जागा विरोधकांकडे आहे. आपल्याकडे या जागेसाठी उमेदवार आहे. याबाबत मित्र पक्षांसोबत चर्चा करू, असे पवार यांनी सांगितले.
शरद पवारांचा ऑनलाईन सहभाग
दरम्यान, ‘राष्ट्रवादी मंथन-वेध भविष्याचा’ या शिबिराचे शिर्डी येथे उद्घाटन झाले. या वेळी पक्षाचे अध्यक्ष शरद पवार व्हिडिओ कॉन्फरन्सिंगद्वारे यात सहभागी झाले होते. न्यूमोनियाची लागण झाल्याने पवारांवर मुंबईतील ब्रिच कँडी रुग्णालयात उपचार सुरू आहेत. मात्र, शिबिराला उपस्थित राहण्याबाबत कार्यकर्त्यांना दिलेला शब्द पाळण्यासाठी पवारांनी ऑनलाईन उपस्थिती लावली. या वेळी राष्ट्रवादीचे प्रदेशाध्यक्ष जयंत पाटील, प्रफुल्ल पटेल, छगन भुजबळ यांच्या हस्ते दीप प्रज्वलन करण्यात आले.
