पुणे / प्रतिनिधी :
कसबा पेठ विधानसभा मतदारसंघाच्या मतमोजणीची सर्व तयारी पूर्ण झाली असून, मतमोजणी गुरुवारी सकाळी आठ वाजल्यापासून भारतीय खाद्य निगम (एफसीआय) गोदाम, कोरेगाव पार्क पुणे येथे सुरू होणार आहे. दुपारपर्यंत निकाल अपेक्षित आहे.
भाजपाच्या दिवंगत आमदार मुक्ता टिळक यांच्या निधनाने रिक्त झालेल्या कसबा पेठ विधानसभेसाठी मागच्या 26 फेब्रुवारीला मतदान झाले होते. भाजपाचे हेमंत रासने व काँग्रेसचे रवींद्र धंगेकर यांच्यात येथे सरळ लढत असून, या जागेसाठी सरासरी 50 टक्क्यांपर्यंत मतदानाची नोंद झाली होती. या पार्श्वभूमीवर गुरुवारी सकाळी आठपासून मतमोजणीस सुरुवात होणार असून, मतमोजणीच्या एकूण 20 फेऱ्या होणार आहेत. ईव्हीएम मतमोजणीसाठी 14 टेबल, तर टपाली मतपत्रिकांसाठी आणि सर्व्हिस वोटर्ससाठीच्या इटीपीबीएससाठी (इलेक्ट्रॉनिकली ट्रान्समिटेड पोस्टल बॅलेट सिस्टीम) प्रत्येकी एक टेबल ठेवण्यात आला आहे. सर्वप्रथम टपाली आणि ईटीपीबीएसची मोजणी होईल. त्यानंतर ईव्हीएम मतमोजणीला सुरुवात होणार आहे. मतमोजणीसाठी प्रत्येक टेबलवर 1 मतमोजणी पर्यवेक्षक, 1 मतमोजणी सहायक आणि 1 सूक्ष्म निरीक्षक, असे एकूण सुमारे 50 अधिकारी-कर्मचारी नेमण्यात आले आहेत.
मतमोजणीच्या प्रत्येक फेरीनंतर उमेदवारनिहाय मतांची उद्घोषणा निवडणूक निर्णय अधिकारी ध्वनीक्षेपकाद्वारे करतील. सर्व फेऱ्या पूर्ण झाल्यानंतर रँडम पद्धतीने 5 व्हीव्हीपॅट मशीनमधील स्लीपची मोजणी केली जाणार आहे. कंट्रोल युनिटवरील मतांची संख्या आणि व्हीव्हीपॅट स्लिप्सची पडताळणी केली जाणार आहे. मतमोजणी केंद्रावर माध्यम कक्ष, पोलीस समन्वय कक्ष, निवडणूक उमेदवार व प्रतिनिधी यांच्यासाठी कक्ष याबाबतची व्यवस्था करण्यात आली आहे. वाहनतळ व्यवस्था गाडगे महाराज विद्यालय कोरेगाव पार्क या ठिकाणी असलेल्या मैदानावरील मोकळय़ा जागेत असणार आहे, अशी माहिती निवडणूक निर्णय अधिकारी श्रीमती किसवे- देवकाते यांनी दिली.
अधिकारी-कर्मचाऱयांना प्रशिक्षण
दरम्यान, निवडणूक निरीक्षक नीरज सेमवाल तसेच निवडणूक निर्णय अधिकारी स्नेहा किसवे-देवकाते यांच्या उपस्थितीत मतमोजणीसाठी नेमलेल्या अधिकारी- कर्मचाऱ्यांना बुधवारी प्रशिक्षण देण्यात आले.
