महिलेनं पतीविरोधात करवीर पोलिस ठाण्यात गुन्हा दाखल केलाय
कोल्हापूर : प्रेमविवाह करूनही लग्नानंतर अवघ्या एक वर्षातच 10 लाखांच्या हुंड्यासाठी सात महिन्याच्या गर्भवतीचा मानसिक छळ अशी घटना समोर आली. या घटनेत पतीने संबंधित महिलेला जीवे मारून टाकण्याची धमकी दिली आहे. करवीर तालुक्यातील वरणगे पाडळीमध्ये ही धक्कादायक घटना घडली आहे. संबंधित पीडित महिलेनं पतीविरोधात करवीर पोलिस ठाण्यात गुन्हा दाखल केला आहे. रोहीत अर्जुन दुधाणे (रा. मधली गल्ली, वरणगे पाडळी ता. करवीर) असे पतीचे नाव आहे.
पीडित महिलेची नर्सिंगचे शिक्षण घेत असताना रोहितशी ओळख झाली होती. ओळखीचे रुपांतर प्रेमात झाल्यानंतर गेल्याच वर्षी मे महिन्यात रोहित आणि पीडिताचा विवाह कोल्हापुरातील शुक्रवार पेठेत विवाह झाला. विवाहानंतर चार महिन्यांनी पीडिता ऑक्टोबर 2024 मध्ये गर्भवती राहिल्यानंतर रोहितने किरकोळ कारणांवरून पीडिताला त्रास देण्यास सुरुवात केली.
पीडिताने तक्रारीत ऑक्टोबर 2024 ते 2 जून 2025 पर्यंत पती रोहितने तुझ्या आई वडिलांनी मला लग्नात काहीच दिले नाही, त्यामुळे दहा लाख रुपये दे म्हणत मारहाण करुन शाररीक, मानसिक छळ करत जीवे मारण्याची धमकी दिल्याचे सांगितले आहे. तसेच रोहीत रोज कामावरुन आल्यानंतर मला, बाळ नको असल्याचे सांगत गर्भपात कर, घटस्फोट दे, तुझ्या आई-वडिलांनी लग्नात काहीच दिले नाही, 10 लाख रुपये दे नाहीतर मला सोडून जा, असे म्हणून त्रास देत होता, असंही तिने नमूद केले आहे.
रोहित घरातून लवकर जाण्यावरून पीडिताने विचारणा केली असता, शिवीगाळ करत तू पहिल्यांदा गर्भपात कर, मग बोल, तू माझ्याकडे राहू नको, निघून जा अशी धमकी दिली. संध्याकाळी उशिरा आल्यानंतर विचारणा केली असता, तू मला काही विचारायचं नाही. पोटावर गुच्ची मारून ठार मारीन अशी रोहितने धमकी दिली. विवाहबाह्य संबंध उघडकीस येताच रोहितने पिडीत महिलेच्या नातेवाईकांवर जीवघेणा हल्ला केला आहे. पीडिताच्या नातेवाईकांनी या संदर्भात कोल्हापूर जिल्ह्यातील इस्पुर्ली पोलीस स्टेशनमध्ये गुन्हा दाखल केला आहे. रोहितचा शोध पोलिसांनी त्याला अटक केली आहे.
