नव्या चित्रपटाचे पोस्टर सादर
अमृता खानविलकर आणि आदिनाथ कोठारे यांची मुख्य भूमिका असलेला ‘चंद्रमुखी’ हा चित्रपट मागील वर्षी प्रदर्शित झाला होता. या चित्रपटाचे दिग्दर्शन प्रसाद ओकने केले होते. या चित्रपटाला मिळालेल्या यशानंतर प्रसाद आणि अमृता पुन्हा एकदा नव्या चित्रपटासाठी एकत्र आले आहेत. या नव्या चित्रपटात दोघेही मुख्य भूमिका साकारणार आहेत. प्रसाद ओकने या चित्रपटाचे पहिले पोस्टर सादर केले आहे. लोकशाहीर पठ्ठे बापूराव यांचे जीवनचरित्र ‘पठ्ठे बापूराव’ या चित्रपटाच्या माध्यमातून सादर करण्यात येणार आहे. या चित्रपटाची कथा आबा गायकवाड यांनी लिहिली असून दिग्दर्शनाची जबाबदारी प्रसाद ओकच सांभाळणार आहे. यापूर्वी त्याने कच्चा लिंबू, हिरकणी, चंद्रमुखी अशा चित्रपटांचे दिग्दर्शन पेले आहे.
पठ्ठे बापूराव या चित्रपटात अमृता खानविलकर ही ‘पवळा’च्या भूमिकेत दिसून येणार आहे. “अभिनेता आणि दिग्दर्शक म्हणून माझी नवी कलाकृती..! आशीर्वाद असू द्या मायबाप हो..! नवनव्या कवनांचा रोज नवा डाव, लेखणीनं घेतला काळजाचा ठाव, जगताना सोसले अनेक घाव शाहिरी परंपरेतलं अजरामर नाव, कलारत्न पठ्ठे बापूराव” असे प्रसादने कॅप्शनदाखल नमूद केले.
श्रीधर श्रीकृष्ण कुलकर्णी रेठरेकर हे शाहिरी परंपरेत पठ्ठे बापूराव या नावाने प्रसिद्ध झाले. परंतु त्यांना जीवनात मोठा संघर्ष करावा लागला. पठ्ठे बापूरावांचा हाच जीवनसंघर्ष मोठ्या पडद्यावर साकारला जाणार आहे.
