प्रणॉय, सात्विक-चिराग उपांत्यपूर्व फेरीत

शेनझेन (चीन) : विश्च बॅडमिंटन फेडरेशनच्या येथे सुरू असलेल्या चायना मास्टर्स आंतरराष्ट्रीय बॅडमिंटन स्पर्धेत भारताच्या एच.एस. प्रणॉय आणि सात्विक-चिराग यांनी उपांत्यपूर्व फेरीत प्रवेश मिळविला आहे. पुरूष एकेरीच्या गुरुवारी येथे झालेल्या सामन्यात विश्व बॅडमिंटन स्पर्धेत कांस्यपदक मिळविणाऱ्या प्रणॉयने डेन्मार्कच्या मॅग्नस जोहान्सेनचा 40 मिनिटांच्या कालावधीत 21-12, 21-18 अशा सरळ गेम्समध्ये पराभव करत शेवटच्या आठ खेळाडूत स्थान मिळविले. या स्पर्धेत आठवे मानांकन मिळालेल्या प्रणॉयची उपांत्यपूर्व फेरीत जापानच्या तृतीय मानांकित नाराओकाशी गाठ पडणार आहे. पुरूष दुहेरीच्या झालेल्या उपउपांत्यपूर्व फेरीच्या लढतीत भारताची टॉप सिडेड जोडी सात्विक साईराज आणि चिराग शेट्टी यांनी जपानच्या कोगा आणि सायटो यांचा 21-15, 21-16 अशा गेम्समध्ये पराभव करत उपांत्यपूर्व फेरीत स्थान मिळविले. सात्विक आणि चिराग यांनी आशियाई क्रीडा स्पर्धेत भारताला सुवर्णपदक मिळवून दिले होते. सात्विक आणि चिराग यांचा उपांत्यपूर्व फेरीचा सामना इंडोनेशियाच्या कॅरेंडो आणि डॅनियल मार्टीन यांच्याशी होणार आहे.