कोकण विकास महासंघ आणि कोकण रेल्वे प्रवासी समितीचा पुरस्कार
ओटवणे | प्रतिनिधी
ओटवणे तथा बावळाट परिसरातील प्रसिद्ध भजनी बुवा मुंबईस्थित प्रकाश गणपत चिले यांनी संत परंपरेचा वारसा जतन करीत संगीत व भजन क्षेत्रात सर्वोत्कृष्ट कार्य व योगदान देत असल्याबद्दल अखिल कोकण विकास महासंघ आणि अखंड कोकण रेल्वे प्रवासी समितीच्यावतीने त्यांना कोकण रत्न पुरस्काराने सन्मानित करण्यात आले. डोंबिवली समाजमंदिर येथे आयोजित करण्यात आलेल्या या कार्यक्रमाच्या व्यासपीठावर अखिल कोकण विकास महासंघाचे अध्यक्ष तानाजी परब, सचिव डॉ. अमित लोखंडे, कार्याध्यक्ष मनिष दाभोलकर, खजिनदार सुनिल अस्टीव्हकर, लोकसेवा समीतीचे अध्यक्ष तथा भाजपा पश्चिम मंडळ उपाध्यक्ष रामचंद्र उर्फ बाळा परब आदी मान्यवर उपस्थित होते. प्रकाश चिले यांनी भजन कलेची जोपासना करताना संगीत सेवेमधून संगीत क्षेत्रात अनेक विद्यार्थी घडविले. तसेच ते आपल्या भजनाच्या माध्यमातून समाजप्रबोधन करताना भजन क्षेत्रात महत्त्वपूर्ण योगदान देत आहेत. त्यांच्या या कलेची दखल घेऊन त्यांना अखिल कोकण विकास महासंघ आणि अखंड कोकण रेल्वे प्रवासी समितीच्यावतीने कोकण रत्न पुरस्काराने गौरविण्यात आले. बुवा प्रकाश चिले इयत्ता चौथी पासुन गेली चार दशके भजन व संगीत क्षेत्रात कार्यरत आहेत. त्यांनी आतापर्यंत राज्यस्तरीय १०० हून भजन स्पर्धांमध्ये सहभाग घेत १९ वेळा प्रथम क्रमांक पटकाविला. तसेच ९०० भजन मंडळांचा समावेश असलेल्या राज्यस्तरीय भजन स्पर्धेत द्वितीय क्रमांक पटकाविला. त्यावेळी माजी केंद्रीय संरक्षण मंत्री शरद पवार यांच्या हस्ते नगरीत सृजनशील पुरस्काराने प्रकाश चिले यांना गौरविण्यात आले. तत्पूर्वी ठाणे, रायगड, पुणे विभागीय भजन स्पर्धेत प्रथम क्रमांक पटकाविला. त्यांनी आतापर्यंत राज्यातील १०२ हून अधिक भजन स्पर्धामध्ये परीक्षण केले आहे. बुवा प्रकाश चिले यांच्या संगीत व भजन कलेतील योगदान बद्दल त्यांना चार वर्षांपूर्वी डोंबिवली येथील अष्टगंधा प्रतिष्ठानचा भजनाचार्य हा पुरस्कार सिंधुदुर्ग जिल्ह्याचे पालकमंत्री रवींद्र चव्हाण यांच्याहस्ते प्रदान करण्यात आला होता. तसेच डोंबिवली येथील गावदेवी प्रासादिक भजन मंडळाचा जिवन गौरव पुरस्कार प्रदान करण्यात आला होता. यावेळी उपस्थित मान्यवरांनी डोंबिवलीकरांच्या आवाजाची शान अशा शब्दात प्रकाश चिले यांच्या भजन कलेचा गौरव करून त्यांच्या पुढील वाटचालीस शुभेच्छा दिल्या. यावेळी प्रकाश चिले यानी आपल्या या जडणघडणीत आपल्या गुरुंसह या क्षेत्रांतील सहकारी तसेच तमाम संगीत व भजन रसिकांच्या प्रोत्साहन महत्त्वाचे असल्याचे सांगून सर्वांचे आभार मानले.
