प्रगती सुंठकरचे कराटे स्पर्धेत यश

बेळगाव : एखादे लक्ष्य किंवा उद्दिष्ट गाठावयाचे असेल तर त्यासाठी अन्य सर्व गोष्टी विसरून त्यासाठी मानसिक  एकाग्रता राखणे आवश्यक असते. असेच ध्येय बाळगणाऱ्या कणबर्गी येथील प्रगती सुंठकर या कराटेपटुने नुकत्याच झालेल्या जिल्हा व राज्यस्तरीय कराटे स्पर्धेत चमकदार कामगिरी नोंदविली आहे. पदवीपूर्व शिक्षण खात्यातर्फे आयोजीत राज्य पातळीवरील कराटे स्पर्धेत प्रगती  हिने तृतीय तर जिल्हा पातळीवर प्रथम क्रमांक मिळवला आहे. प्रगती सध्या  आरएलएस कॉलेजमध्ये शिक्षण घेत आहे.  कणबर्गी येथील शोटो कॉन कराटे अकॅडमीमध्ये ती कराटे प्रशिक्षक सौरभ माने यांच्या मार्गदर्शनाखाली प्रशिक्षण घेत आहे.  खानापूर तालुक्यातील बिडी गावात नुकत्याच झालेल्या जिल्हास्तरीय कराटे स्पर्धेत तिने प्रथम क्रमांक पटकावला आहे. त्याचप्रमाणे राज्यस्तरीय कराटे स्पर्धेमध्ये तृतीय क्रमांक मिळवला. प्रगती सुंठकर ही ब्ल्यू बेल्टची मानकरी आहे. त्याचप्रमाणे भविष्यात आर्मी ऑफिसर बनण्याचे तिचे स्वप्न आहे. तिला आई पूनम आणि वडील परशुराम यांचे प्रोत्साहन लाभते. त्याचप्रमाणे मल्लेश चौगुले आणि  अन्य मान्यवरांचे मार्गदर्शन मिळत आहे.