शिरोळ प्रतिनिधी
अल्टो कारने मोपेडला पाठीमागून ठोकल्याने उसाने भरलेल्या ट्रॅक्टरच्या चाकाखाली सापडून शिरोळमधील पूजा दत्तात्रय माळी (वय 22 वर्षे )या तरुणीचा जागीच मृत्यू झाला. ही दुर्दैवी घटना सोमवार दिनांक 19 डिसेंबर 2022 रोजी सायंकाळी सहा वाजण्याच्या सुमारास शिरोळ नृसिंहवाडी मार्गावरील संजय सांस्कृतिक हॉल नजीक घडली.
शिरोळमधील पूजा सुभाष पाटील व पूजा दत्तात्रय माळी या दोघी मैत्रिणी धार्मिक सोहळ्यास उपस्थित राहून त्या नृसिंहवाडीवरून शिरोळकडे मोपेडवरून येत होत्या. पूजा पाटील मोपेड चालवीत होती तर पूजा माळी पाठीमागे बसली होती. मोपेडवरून येत असताना संजय सांस्कृतिक हॉल नजीक शिरोळच्या दिशेने येत असलेल्या उसाने भरलेल्या ट्रॅक्टरला ओव्हरटेक करत होत्या. त्याचवेळी पाठीमागून येणाऱ्या अल्टो कारने मोपेडला जोरात धडक दिली. या धडकेत पाठीमागे बसलेली पूजा माळी ही तरुणी मोपेड वरून फेकली जाऊन ट्रॅक्टरच्या चाकाखाली सापडली. या अपघातात तिच्या डोक्यावरून चाक गेल्याने तिचा जागीच मृत्यू झाला. तर पूजा पाटील विरोधी दिशेला पडल्याने किरकोळ जखमी झाली. तिला उपचारासाठी खाजगी रुग्णालयात दाखल करण्यात आले आहे.
अपघातस्थळी व शिरोळ ग्रामीण रुग्णालय या ठिकाणी मोठी गर्दी झाली होती.
दरम्यान, रात्री उशिरा ग्रामीण रुग्णालयात पूजा माळी हिच्या मृतदेहाचे शवविच्छेदन करण्यात येऊन मृतदेह नातेवाईकांच्या ताब्यात देण्यात आला. या घटनेची रात्री उशिरा शिरोळ पोलीस ठाण्यात नोंद करण्यात आली. मृत पूजा माळी ही अजिंक्यतारा मंडळ परिसरात राहत होती. पदवीधर शिक्षण घेतलेल्या पूजाचा स्वभाव मनमिळाऊ असल्याने तिच्या दुर्दैवी अपघाती मृत्यूमुळे परिसरात शोककळा पसरली आहे. पूजाच्या पश्चात आई-वडील ,आजा- आजी ,भाऊ असा परिवार आहे, माळी कुटुंबियांचा हृदय पिळवून टाकणारा आक्रोश पाहून सर्वांच्याच डोळ्यात अश्रू तरळले
