पोलीस स्थानकांमधील स्वच्छता कर्मचाऱ्यांचे आंदोलन

बेळगाव : पोलीस स्थानकांमध्ये स्वच्छतेचे काम करणारे कर्मचारी मागील 20 ते 30 वर्षांपासून सेवा देत आहेत. परंतु, या कर्मचाऱ्यांना केवळ 3 हजार 500 रुपये मानधन दिले जाते. राज्य सरकारने याचा विचार करून मानधनात वाढ करावी व ड वर्ग कर्मचारी म्हणून नियुक्ती करावी, अशी मागणी पोलीस स्थानकांमधील स्वच्छता कर्मचाऱ्यांनी आंदोलनाद्वारे केली आहे. पोलीस स्थानक तसेच पोलिसांच्या विविध विभागांमध्ये 977 हून अधिक कर्मचारी मानधनावर काम करीत आहेत. परंतु, या कर्मचाऱ्यांना अत्यंत कमी मानधनावर काम करावे लागत आहे. यामुळे कुटुंब चालवणेही कठीण झाले आहे. अनेकवेळा आंदोलन करूनदेखील राज्य सरकारने या कर्मचाऱ्यांकडे लक्ष पुरविलेले नाही.यामुळे या सर्व कर्मचाऱ्यांचे जगणे कठीण झाले असून राज्य सरकारने त्यांचा स्वतंत्रपणे विचार करावा, अशी मागणी पोलीस स्थानकातील स्वच्छता कर्मचाऱ्यांकडून करण्यात आली.