पुणे / वार्ताहर :
गुटखा विक्रीवर बंदी असतानाही पुणे शहरात खुलेआम गुटखा विकला जात असल्याचे पोलिसांच्या निदर्शनास आले. त्यानंतर पोलिसांनी गुटखा विक्रेत्यांविरोधात आक्रमक पाऊल उचलत शहरातील विविध भागात छापेमारी करत 25 जणांवर गुन्हे दाखल केले.
हडपसर, लोणीकाळभोर, मुंढवा, विश्रांतवाडी, येरवडा, विमानतळ, चंदननगर, चतुशृंगी, सिंहगड रोड, कोथरुड, वारजे, उत्तमनगर, दत्तवाडी, भारती विद्यापीठ, शिवाजीनगर, डेक्कन, समर्थ, सहकारनगर परिसरात पोलिसांनी छापेमारी केली. हडपसर पोलीस ठाण्याच्या हद्दीत केशवनगर येथे एका टपरीवर कारवाई करुन 10,800 रुपयांचा गुटखा जप्त करण्यात आला. याप्रकरणी संतोष दत्तात्रय थेरकर (वय 52) यास अटक करण्यात आली. मुंढवा पोलीस ठाण्याच्या हद्दीत घोरपडीगाव येथे एका दुकानावर कारवाई करुन 10,900 रुपयांचा गुटखा हस्तगत करण्यात आला. याप्रकरणी संतोष शंकर इंगवले (44) यास अटक करण्यात आली.
टिंगरेनगरमध्ये अशाचप्रकारे कबीर अब्बास (वय-28) या टपरी चालकाने 10 हजार रुपयांचा गुटखा विक्रीस ठेवल्याने त्याच्यावर गुन्हा दाखल करण्यात आला. तर, येरवडातील शास्त्रीनगरमध्ये अब्दुल रेहमान मोहम्मद मेकर्ला (वय-45) याच्याकडून पोलिसांनी 10,000 रुपयांचे सिगारेट व गुटखा जप्त केला आहे. विमानतळ पोलीस ठाण्याचे हद्दीत लोहगावमधील जय भोले पान शॉपवर कारवाई करत पोलिसांनी 10782 रुपयांचा पानमसाला जप्त करत टपरी मालक मुकेश गुप्ता (वय-34) याच्यावर गुन्हा दाखल केला. चतुश्रृंगी पोलिसांनी पाषाण भागात एका बेकरीवर कारवाई करुन तिथे विक्रीसाठी ठेवलेला 25 हजारांचा गुटखा जप्त केला आहे.
