वृत्तसंस्था/ नवी दिल्ली
खासगी क्षेत्रात काम करणाऱ्या कोट्यावधी लोकांसाठी आनंदाची बातमी आहे. दिवाळीपूर्वी सुमारे 8 कोटी ईपीएफओ वापरकर्त्यांना काही फायदे देण्यासाठी सरकार तयारी करत आहे. यामध्ये ईपीएफओची किमान पेन्शन देखील वाढवता येण्याची शक्यता सांगितली जात आहे. सध्या ती दरमहा 1,000 रुपये आहे. परंतु कामगार संघटना बऱ्याच काळापासून ती वाढवण्याची मागणी करत आहेत. एका अहवालानुसार, ईपीएफओ सदस्यांच्या सुविधा सुलभ करण्यासाठी पुढील महिन्यात ईपीएफओ 3.0 नावाच्या उपक्रमाचा विचार करण्यात येणार असल्याची माहिती आहे.
सूत्रांचे म्हणणे आहे की, ईपीएफओचे केंद्रीय विश्वस्त मंडळ 10-11 ऑक्टोबर रोजी कामगार आणि रोजगार मंत्री मनसुख मांडवीया यांच्या अध्यक्षतेखाली बैठक घेणार आहे. यात कर्मचारी, राज्य सरकारे आणि केंद्र सरकारचे प्रतिनिधी समाविष्ट आहेत. ईपीएफओमधून अंशत: पैसे काढण्यास परवानगी देण्याच्या प्रस्तावाला कामगार संघटना विरोध करू शकतात.
किमान पेन्शन
सरकार दिवाळीपूर्वी ईपीएफओ वापरकर्त्यांना काही फायदे देण्याची तयारी करत आहे. यामुळे लोकांना खर्च करणे सोपे होईल. या अंतर्गत, लोक त्यांच्या पीएफचा काही भाग एटीएममधून काढू शकतील. ईपीएफओचे केंद्रीय विश्वस्त मंडळ किमान पेन्शन वाढवण्याचा विचार देखील करू शकते. सध्या ते दरमहा 1,000 रुपये आहे. कामगार संघटना बऱ्याच काळापासून ते 1,500 रुपयांवरून 2,500 रुपये करण्याची मागणी करत आहेत.
