मुत्नाळ ग्रामस्थांचे स्मशानभूमीसाठी जिल्हाधिकाऱ्यांना निवेदन

बेळगाव : मुत्नाळ गावातील अनुसूचित जातीमध्ये नागरिकांसाठी स्मशानभूमी मंजूर करण्यासाठी अनेकवेळा निवेदन देऊनही दखल घेण्यात आलेली नाही. सरकारी जागा उपलब्ध असूनही स्मशान मंजूर करण्याकडे दुर्लक्ष करण्यात येत आहे. त्वरित स्मशानभूमीसाठी जागा मंजूर करावी, अशा मागणीचे निवेदन ग्रामस्थांतर्फे जिल्हाधिकाऱ्यांना देण्यात आले. मुत्नाळ गावातील मागासवर्गीय समाजासाठी स्मशानभूमी नसल्याने नागरिकांची मोठी पंचायत होत आहे. गावामध्ये सर्व्हे नं. 1/1 ब मध्ये 1 एकर 10 गुंठे सरकारी जमीन उपलब्ध आहे. मात्र यामध्ये स्मशानभूमी मंजूर करण्यात आलेली नाही. यासाठी अनेकवेळा निवेदन देण्यात आले. मात्र दखल घेण्यात आली नाही. गावातील निंगाप्पा कुडची नामक व्यक्तीकडून आपली मालकी 34 गुंठे जमीन देण्यासाठी पुढाकार घेतला आहे. प्रशासनाने सदर जमीन त्वरित खरेदी करून स्मशानभूमी उपलब्ध करून द्यावी आणि उपलब्ध असणारी सरकारी जमीन गावातील मागासवर्गीय समाजासाठी द्यावी, अशी मागणी करण्यात आली. यावेळी शेतकरी नेत्यांसह ग्रामस्थ मोठ्या संख्येने उपस्थित होते.