दोन तासात संशयितास ताब्यात घेण्यात पोलिसांना यश
पेठवडगाव प्रतिनिधी
वीटभट्टीवर काम करणाऱ्या कुटुंबातील तरुणीचा अत्याचार करुन खून केल्याची धक्कादायक घटना वाठार येथे आज दुपारी उघडकीस आली. पूजा खंडू आडगळे (वय 19, रा. सध्या वाठार तर्फ वडगाव, ता. हातकणंगले. मूळ गाव वागजी, जि. लातूर) असे मृत तरुणीचे नाव आहे. याप्रकरणी वडगाव पोलिसांनी अवघ्या दोन तासातच संशयित सनी कांबळे याचा शोध घेऊन त्याला ताब्यात घेतले. याप्रकरणी संशयिताने खुनाची कबुली दिली आहे. या घटनेची नोंद वडगाव पोलिसात झाली आहे.
याबाबत पोलिसातून मिळालेली माहिती अशी, लातूर जिह्यातून खंडू आडगळे हे आपल्या कुटुंबासह आठ वर्षांपूर्वी वाठार तर्फ वडगाव येथे येऊन राहिले आहेत. ते उदरनिर्वाहासाठी वीटभट्टीवर काम करतात. त्यांची मुलगी पूजा हि येथल एका दुकानात काम करत होती. तिला गेल्या दोन वर्षापासून वाठार येथील सनी कांबळे हा त्रास देत होता. त्याला खंडू आडगळे व अनिल कुंभार यांनी पूजाला त्रास देऊन नको अशी समज दिली होती. तरीही तो तिला त्रास देत होता.
दरम्यान, सोमवार, 9 रोजी रात्रीच्या सुमारास पूजा कामावरून घरी येत असताना वाठार येथील दत्त मंदिराकडे जाणाऱ्या रस्त्यावर संशयिताने तिला अडवून शेतात नेऊन तिच्यावर अत्याचार करुन तिचा खून केला. तसेच पुरावा नष्ट करण्याच्या उद्देशाने तिचे प्रेत दत्त मंदिर येथील ओढ्यात झुडुपात टाकून दिले होते. पूजा घरी न आल्याने तिचे वडिल गेल्या पाच-सहा दिवसापासून तिचा शोध घेत होते.
दरम्यान, रविवारी रात्रीपासून या परिसरात मृतदेहाची दुर्गंधी येऊ लागल्यानंतर नागरिकांनी पहिले असता ओढ्यात मुलीचे प्रेत कुजलेल्या अवस्थेत दिसून आले. याची माहिती वडगाव पोलिसांना देण्यात आली. घटनास्थळी डीवायएसपी रोहिणी साळुंके, वडगाव पोलीस ठाण्याचे पोलीस निरीक्षक भैरव तळेकर, पीएसआय प्रियांका खाडे, गिरीष शिंदे, हवालदार श्रीकांत दाभोळकर, रवी गायकवाड आदींनी माहिती घेतली. घटनास्थळी वडिल खंडू आडगळे यांना बोलावले असता कपडे व इतर वस्तूंवरून मुलगीची ओळख पटली. पंचनामा करून मृतदेहाचे शवविच्छेदन सीपीआर रुग्णालयात करण्यात येऊन मृतदेह नातेवाईकांच्या ताब्यात दिला.
या प्रकरणी संशयिताला ताब्यात घेतले. सनी कांबळे हा व्यसनी असनून त्याच्यावर मारामारी प्रकरणी गुन्हेही दाखल आहेत. या घटनेबद्दल हळहळ व्यक्त होत असून संशयितास जास्तीत जास्त शिक्षा व्हावी, अशी मागणी वाठार व परिसरातील महिला, सामाजिक संघटना व नागरिकांतून होत आहे.
