जनता पुन्हा एकदा मला निवडून देणार : लक्ष्मी हेब्बाळकर

बेळगाव : या वेळेच्या विधानसभा निवडणुकीत ग्रामीण मतदार क्षेत्रातून मला भरपूर पाठिंबा मिळत असून प्रचारादरम्यान नागरिकांनी मोठ्या संख्येने उपस्थित राहून सहकार्य केले आहे. मी पाच वर्षांत केलेल्या विकासकामांमुळे नागरिक समाधानी आहेत. त्यामुळे पुन्हा एकदा मी या निवडणुकीत निवडून येणार, असा विश्वास बेळगाव ग्रामीण काँग्रेसच्या अधिकृत उमेदवार लक्ष्मी हेब्बाळकर यांनी व्यक्त केला. सोमवारी प्रचाराच्या शेवटच्या दिवशी प्रसारमाध्यमांशी बोलताना त्यांनी आपण विजयी होणार असल्याचा विश्वास व्यक्त केला असून या वेळेला गतवेळेपेक्षा अधिक मतदान होणार आहे, असे सांगितले. गेल्या पाच वर्षांमध्ये ग्रामीण आमदार म्हणून काम करीत असताना सर्वसामान्य जनतेच्या आपण समस्या सोडविल्या आहेत. अनेक विकासकामे या मतदार क्षेत्रात राबविली आहेत. त्याची पोचपावती मला मिळणार आहे. सर्वांशी आपुलकीचे नाते निर्माण झाले आहे. ज्या ज्या ठिकाणी मी प्रचाराला गेले त्या ठिकाणी लक्ष्मीआक्का तुमच्या सोबत आहोत, असे समर्थकांनी सांगितल्याचे लक्ष्मी हेब्बाळकर यांनी सांगितले.