होडारचा नवीन पूल लोकांना लवकर झालेला हवा : काब्राल

केपे : होडार येथील नवीन पुलाचे काम ऐन दहावीच्या परीक्षेच्या वेळी हाती घेतल्याने व जुना पूल बंद ठेवल्याने त्यावरून राजकारण तापून नगरसेवक बाळकृष्ण होडारकर यांनी तीव्र प्रतिक्रिया दिली होती. त्याला उत्तर देताना सार्वजनिक बांधकाममंत्री नीलेश काब्राल यांनी म्हटले आहे की, कुडचडेतील विद्यार्थ्यांचे पालक मला ओळखतात व लोक माझ्या संपर्कात आहेत. कोणीही विरोध केला नाही. लोकांना नवीन पूल लवकरात लवकर झालेला हवा आहे, असे काब्राल म्हणाले. जुन्या पुलाची ऊंदी कमी असल्याने एक गाडी गेली, तर दुसरी सुटत नव्हती. त्यामुळे अनेक अपघात व मृत्यूही झाले. हा नवा पूल महत्त्वाचा असून तो लवकारात लवकर पूर्ण करण्याचा हेतू आहे. दहावीच्या परीक्षा आहेत हे या लोकांनी सांगण्याची गरज नाही. कुडचडेतील जनतेला सारे माहीत आहे व त्यांना विकास झालेला हवा आहे. म्हणून तर गेले एक वर्ष रस्ते खोदलेले आहेत व त्रासही होत आहेत, तरी देखील जनता समजून घेत आहे. कोणतेही विकासकाम करताना त्रास होत असतोच, असे काब्राल म्हणाले. मी गेल्या 15 वर्षांपासून दरवर्षी शिबिर व इतर माध्यमांतून मुलांना पुस्तके व इतर साहित्याचे वाटप करत आलो आहे. सतत मुलांच्या संपर्कात राहिलेलो आहे. जे पुलावरून राजकारण करतात त्यांनी मुलांसाठी काय केले आहे ते स्पष्ट करावे, असे ते पुढे म्हणाले.