दुरदुंडेश्वर सिद्ध संस्थान मठाच्या श्री सिद्धलिंग स्वामीजींचे देहावसान

बेळगाव : अरभावी, ता. गोकाक येथील प्रसिद्ध श्री दुरदुंडेश्वर सिद्ध संस्थान मठाचे पीठाधिपती श्री सिद्धलिंग स्वामीजी (वय 74) यांचा रविवारी रात्री हृदयाघाताने देहान्त झाला. सोमवारी सायंकाळी शोकाकुल वातावरणात त्यांना अखेरचा निरोप देण्यात आला. रविवारी रात्रीच्या धार्मिक विधींची तयारी सुरू असतानाच त्यांना हृदयविकाराचा झटका आला. तातडीने त्यांना गोकाक येथील खासगी इस्पितळात हलवण्यात आले. उपचारांचा उपयोग न होता त्यांची प्राणज्योत मालवली. त्यांचा जन्म रामदुर्ग तालुक्यातील सालहळ्ळी येथे झाला. ते अरभावी मठाचे अकरावे पीठाधिपती होते. अनेक राज्यात मठाचे भक्त आहेत. सोमवारी त्यांच्या अंत्यदर्शनासाठी मठाच्या आवारात भाविकांची मोठी गर्दी जमली होती. गदग येथील तोंटदार्य मठाचे जगद्गुरू डॉ. तोंटद सिद्धराम स्वामीजी, कारंजी मठाचे श्री मनिप्र गुरुसिद्ध स्वामीजी, नागनूर रुद्राक्षी मठाचे डॉ. अल्लमप्रभू स्वामीजी, कडोली येथील दुरदुंडेश्वर विरक्त मठाचे श्री गुरु बसवलिंग स्वामीजींसह राज्यातील विविध मठाधीशांनी शोक व्यक्त केले आहे. त्यांनी स्वामीजींचे अंत्यदर्शनही घेतले. अरभावीचे आमदार भालचंद्र जारकीहोळी, विधान परिषदेचे माजी सदस्य महांतेश कवटगीमठ, विधान परिषदेचे सदस्य चन्नराज हट्टीहोळी आदींसह राजकीय, धार्मिक क्षेत्रातील व राज्यातील विविध भागातून आलेल्या मठाधीशांच्या उपस्थितीत अंत्यसंस्कार करण्यात आले. अरभावी मठाच्या उत्तराधिकारीपदी श्री. गुऊ बसवलिंग स्वामी कडोली येथील दुरदुंडेश्वर विरक्त मठाचे श़्री गुऊ बसवलिंग स्वामीजी यांची अरभावी मठाच्या उत्तराधिकारीपदी निवड झाली आहे. अरभावी मठाचे नूतन पीठाधिपती म्हणून ते विराजमान होतील.