20 प्रवासी जखमी, 7 जणांची प्रकृती चिंताजनक
वृत्तसंस्था/ शाहजहानपूर
उत्तर प्रदेशातील शाहजहानपूरमधून येथे रविवारी सकाळी पंजाब मेल एक्स्प्रेसमध्ये अचानक चेंगराचेंगरी झाली, त्यात 20 हून अधिक प्रवासी जखमी झाले. रेल्वेमध्ये अचानक आग लागल्याची अफवा पसरल्यामुळे अनेक प्रवाशांनी घाबरून चालत्या रेल्वेमधून उड्या मारल्या. यादरम्यान चेंगराचेंगरी झाल्याचेही सांगण्यात आले. जखमींना शाहजहानपूर मेडिकल कॉलेजमध्ये दाखल करण्यात आले असून 7 जणांची प्रकृती चिंताजनक असल्याचे सांगण्यात येत आहे. ही घटना बरेली आणि कटरा स्थानकादरम्यान घडली.
एक्स्प्रेसमध्ये आग लागल्याची अफवा पसरताच प्रवासी चालत्या रेल्वेमधून अचानक उड्या मारू लागले. घाबरलेले लोक जीव वाचवण्यासाठी पळू लागले. याप्रसंगी चेंगराचेंगरीत अनेक जण जखमी झाल्याचे सांगण्यात येत आहे. जखमींना उपचारासाठी शहाजहानपूर मेडिकल कॉलेजमध्ये दाखल करण्यात आले. अमृतसरहून हावडाकडे जाणाऱ्या पंजाब मेल एक्स्प्रेस क्रमांक 13006 मध्ये ही घटना घडली. आगीच्या अफवेनंतर प्रवाशांनी आपला जीव वाचवण्यासाठी टेनमधून उड्या घेतल्याचे सांगण्यात येत आहे. सीझफायर सिलिंडरच्या गळतीमुळे धूर निर्माण झाल्यानंतर लोकांना तो आगीचा धूर वाटल्याने अफवा पसरल्याचे सदर एक्स्प्रेसमधून प्रवास करणाऱ्या एका प्रत्यक्षदर्शी प्रवाशाने सांगितले. या घटनेने जीआरपीसह रेल्वे प्रशासनात खळबळ उडाली आहे. बोगी रिकामी झाल्यानंतर टेन थांबवून तपासणी केली असता सर्व काही ठीक असल्याचे दिसून आले.
