गोवा शिपयार्डतर्फे वक्तृत्व स्पर्धेत विविध महाविद्यालयांचा सहभाग

वास्को : भ्रष्टाचारमुक्त भारताबाबत समाजात विशेषत: तरूणांमध्ये जागृती निर्माण करण्याच्या उद्धेशाने गोवा शिपयार्डच्या दक्षता विभागातर्फे बिटस् पिलानी के के बीर्ला गोवा कॅम्पसच्या सहकार्याने आंतरमहाविद्यालयीन वक्तृत्व स्पर्धेचे आयोजन करण्यात आले. ‘भ्रष्टाचार का विरोध करे, राष्ट्र के प्रति समर्पित रहे’ या विषयावर सदर स्पर्धा घेण्यात आली. या स्पर्धेत बिटस् पिलानी गोवा कॅम्पस, कार्मेल कॉलेज, खांडोळा सरकारी महाविद्यालय, इन्स्टिट्यूट ऑफ टेक्नोलोजी (एनआयटी गोवा), एमईएस कॉलेज, पार्वतीबाई चौगुले कॉलेज व श्री दामोदर कॉलेज या महाविद्यालयातील विद्यार्थ्यानी भाग घेतला होता. या स्पर्धेच्या उद्घाटनप्रसंगी प्रमुख पाहुण्या म्हणून बीटस् पिलानीच्या डीन प्रा. मिनल कौशिक उपस्थित होत्या. यावेळी असोसिएट डीन प्रा. अंगशुमन सरकार, गोवा शिपयार्डचे विभाग प्रमुख शशिकांत कांबळे, सेबेस्तियाव फर्नांडिस उपस्थित होते. प्रमुख पाहुण्या प्रा. मिनल कौशिक यांनी भ्रष्टाचारमुक्त समाज निर्माण करण्याविषयी आपले विचार मांडले. कार्यक्रमाचे सूत्रसंचालन गोवा शिपयार्डच्या दक्षता विभागाच्या लोचन कारेकर यांनी केले. या स्पर्धेत इंग्रजी विषयात कार्मेल कॉलेजने प्रथम व द्वितीय क्रमांकाचे बक्षीस पटकावले. दामोदर कॉलेजला तृतीय तर एनआयटी गोवा यांना चौथे पारितोषिक प्राप्त झाले. हिंदी विषयावरील स्पर्धेत कार्मेल कॉलेजने प्रथम क्रमांकाचे बक्षीस पटकावले. दुसरे बक्षीस बिटस पिलानी गोवा यांना प्राप्त झाले. तिसरे व चौथे बक्षीस अनुक्रमे एनआयटी गोवा व चौगुले महाविद्यालय यांना देण्यात आले.