नवी दिल्ली \ ऑनलाईन टीम
संसदेचं पावसाळी अधिवेशनाला आजपासून सुरु झालं आहे. दरम्यान, पहिल्यांदाच केंद्रीय मंत्रिमंडळात स्थान मिळालेल्या केंद्रीय आरोग्य व कुटुंब कल्याण राज्यमंत्री डॉ. भारती पवार या संसदेत दाखल झाल्या. यावेळी त्या संसदेच्या पायथ्याशी नतमस्तक झाल्या. नतमस्तक झाल्याचे काही फोटो त्यांनी सोशल मीडियावर शेअर केले आहेत.
डॉ. भारती पवार यांनी संसदेत दाखल झाल्यानंतर संसदेच्या पायथ्याशी नतमस्तक झाल्याचे काही फोटो ट्विट करत म्हटले आहे की, भारताचे लाडके पंतप्रधान आदरणीय पंतप्रधान नरेंद्र मोदी यांच्या मंत्रिमंडळात राज्यमंत्री पदाची शपथ घेतल्यानंतर सुरू होत असलेल्या अधिवेशनाच्या पहिल्या दिवशी नतमस्तक होत कायम स्वरुपी जनतेच्या सेवेत समर्पित, असं म्हटलं आहे.
पंतप्रधान नरेंद्र मोदी यांच्या मंत्रिमंडळाचा काही दिवसांपूर्वी विस्तार झाला. मोदींच्या मंत्रिमंडळात दिंडोरी मतदारसंघाच्या खासदार डॉ. भारती पवार यांना स्थान मिळालं. डॉ. भारती पवार या ए. टी. पवार यांच्या सून आहेत. पवार यांना आमदारकी व खासदारकीत दोन्ही वेळेस राष्ट्रवादीने त्यांच्या गृहकलहामुळे तिकीट दिले नव्हते. यामुळे त्यांनी २०१९ मध्ये भाजपमध्ये प्रवेश केला. २०१९ मध्ये त्यांनी राष्ट्रवादीच्या धनराज महालेंचा पराभव केला.
