बेळगाव : शहरामध्ये पार्किंगची समस्या नित्याचीच बाब बनली आहे. जागा मिळेल त्या ठिकाणी वाहने पार्किंग केली जात आहेत. विशेष करून सरकारी कार्यालयांच्या परिसरात पार्किंग समस्या गंभीर बनली आहे. शहर परिसरात होणारी वाहतूक कोंडी दूर करण्यासाठी पोलीस प्रशासनाकडून प्रयत्न केले जात असले तरी सरकारी कार्यालयांच्या परिसरात निर्माण होणारी वाहतूक कोंडी समस्या कायम आहे. येथील जिल्हा पंचायत कार्यालयाच्या समोर करण्यात येणारे पार्किंग अधिकाऱ्यांसाठी डोकेदुखी ठरली आहे. जिल्हा पंचायत कार्यालयाला या ना त्या कारणाने कामानिमित्त येणाऱ्या नागरिकांसह विविध खात्याच्या अधिकाऱ्यांची नेहमीच वर्दळ असते. जिल्हा पंचायत कार्यालयासमोरील कचेरी रोडवर दुतर्फा होणारे वाहन पार्किंग वाहतूक कोंडीत भर घालणारे ठरत आहे. त्यामुळे जिह्याच्या इतर तालुक्यातून कामानिमित्त जिल्हा पंचायत कार्यालयात येणाऱ्या अधिकाऱ्यांसह नागरिकांना वाहन पार्किंगच्या समस्येला सामोरे जावे लागत आहे. जिल्हा पंचायत कार्यालयासमोर अनेक खासगी वाहनधारक वाहने पार्किंग करत असल्याने जिह्याच्या इतर तालुक्यातून आलेल्या अधिकाऱ्यांना वाहन पार्किंग करण्यासाठी जागा मिळत नसल्याने मोठी अडचण निर्माण होत आहे. पोलीस प्रशासनाकडून वाहतुकीला शिस्त लावून होणारी वाहतूक कोंडी दूर करण्यासाठी प्रयत्न केले जात आहेत. मात्र शासकीय कार्यालयांच्या परिसरात होणाऱ्या वाहतूक कोंडीकडे दुर्लक्ष करण्यात येत असल्याने नागरिकांना याचा त्रास सहन करावा लागत आहे. अनेक वाहनधारक वाहने पार्किंग करून बाजारहाट करीत आहेत. त्यामुळे बाहेरील तालुक्यातून येणाऱ्या नागरिकांना वाहन पार्किंग करण्यासाठी जागेची शोधाशोध करावी लागत आहे. याकडे रहदारी पोलिसांनी लक्ष देऊन समस्या सोडवण्याची मागणी नागरिकांतून केली जात आहे.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
