चित्रपटाची पोस्टर्स प्रदर्शित
अभिनेता पंकज त्रिपाठी लवकरच माजी पंतप्रधान अटलबिहारी वाजपेयी यांच्या बायोपिकमध्ये दिसून येणार आहे. चित्रपटातील त्रिपाठी यांचा फर्स्ट लुक सध्या सोशल मीडियावर व्हायरल होत आहे. 25 डिसेंबर रोजी पूर्ण देश माजी पंतप्रधान अटलबिहारी वाजपेयी यांची जयंती साजरी करत असताना त्रिपाठी यांनी सोशल मीडियावर ‘मैं अटल हूं’ चित्रपटात दिसून येणार असल्याची घोषणा केली आहे. तर प्रसारित पोस्टर्समध्ये पंकज त्रिपाठी हे मेकअप तसेच प्रोस्थेटिक्सच्या मदतीने हुबेहुब वाजपेयींसारखे दिसून येत आहेत.
या चित्रपटासाठी प्रेक्षकांना अद्याप एक वर्ष प्रतीक्षा करावी लागणार आहे. हा चित्रपट पुढील वर्षाच्या अखेरीस प्रदर्शित होणार आहे. अटलबिहारी यांचे व्यक्तिमत्त्व मोठय़ा पडद्यावर साकारण्यासाठी मला संयमाने माझ्या व्यक्तिमत्त्वावर काम करणे गरजेचे आहे. स्फूर्ती आणि मनोबलाच्या आधारावर मी नव्या भूमिकेला न्याय देऊ शकेन हा अटल विश्वास मला आहे. ‘मैं अटल हूं’ हा चित्रपट डिसेंबर 2023 मध्ये प्रदर्शित होणार असल्याचे त्रिपाठी यांनी नमूद पेले आहे.
चित्रपटाचे दिग्दर्शन मराठी चित्रपटसृष्टीतील प्रसिद्ध दिग्दर्शक रवि जाधव हे करणार आहेत. चित्रपटाच्या पोस्टर्सना चाहत्यांकडून मोठा प्रतिसाद मिळत आहे. अशाप्रकारच्या भूमिकेत पंकज त्रिपाठी यांना पाहण्यासाठी त्यांचे चाहते अत्यंत उत्सुक आहेत.
