पंचमे खांडेपार तळीतील गाळ उपसण्यास प्रारंभ

फोंडा : पंचमे खांडेपार येथील नैसर्गिक तळीतील गाळ उपसण्याचे काम मिशन अमृत सरोवर या योजनेअंतर्गत हाती घेण्यात आले आहे. फोंड्याचे आमदार तथा कृषीमंत्री रवी नाईक यांच्या उपस्थितीत मंगळवार 23 रोजी या कामाला प्रारंभ करण्यात आला. जलसंवर्धन खात्यातर्फे रु. 4 लाख 92 हजार खर्चुन या तळीचे काम हाती घेण्यात आले असून येत्या आठ दिवसात ते पूर्ण करण्याचे उद्दिष्ठ आहे. पंचमे खांडेपार येथील या तळीच्या पाण्याचा वापर आसपासची कुळागरे व बागायतीच्या सिंचनासाठी केला जातो. चिखल मातीच्या भरावामुळे तळीत साचलेला गाळ  उपसून पाण्याचा साठा जपून ठेवावा लागतो. त्यामुळे हे काम पावसाळ्यापूर्वी हाती घेण्यात आल्याची माहिती मंत्री रवी नाईक यांनी दिली. यावेळी कुर्टी खांडेपार पंचायतीच्या सरपंच संजना सुदेश नाईक, उपसरपंच विल्मा परेरा, स्थानिक पंचसदस्य मनीष नाईक, हरिष नाईक, साजिदा सय्यद, जलसंवर्धन खात्याचे अभियंते शैलेश नाईक, अभिजीत गावडे, माजी सरपंच जॉन परेरा व स्थानिक नागरिक उपस्थित होते.