विरोधी पक्षनेते आर. अशोक यांची सिव्हिलच्या प्रसूती विभागाला भेट

बेळगाव : नवजात शिशू व बाळंतिणींच्या मृत्यू प्रकरणानंतर विरोधी पक्षनेते आर. अशोक यांनी रविवारी रात्री सिव्हिल हॉस्पिटलमधील प्रसूती विभागाला भेट देऊन येथील व्यवस्थेची पाहणी केली. मृत्यू रोखण्यासाठी सरकारने त्वरित पावले उचलण्याची मागणी त्यांनी केली आहे. आर. अशोक यांच्यासमवेत माजी मंत्री शशिकला जोल्ले, माजी आमदार संजय पाटील, डॉ. सोनाली सरनोबत आदींसह स्थानिक नेते उपस्थित होते. हा मुद्दा आपण विधानसभेत उपस्थित करणार असल्याचे विरोधी पक्षनेत्यांनी सांगितले. सरकारला बाळंतिणींच्या मृत्यू प्रकरणाचे गांभीर्य राहिले नाही. केवळ बेळगाव जिल्ह्यातच सहा महिन्यांत 29 बाळंतिणी व 322 नवजात शिशुंचा मृत्यू झाला आहे. आता राज्याची परिस्थिती काय असणार, असा प्रश्नही उपस्थित केला. बिम्सचे वैद्यकीय संचालक डॉ. अशोककुमार शेट्टी यांनी विरोधी पक्षनेत्यांना माहिती दिली. प्रसूतीसाठी दाखल झालेल्या महिलांच्या नातेवाईकांची भेट घेऊन सिव्हिलमधील व्यवस्थेविषयी माहिती घेतली. हे प्रकरण विधानसभेत गांभीर्याने मांडण्याची ग्वाही यावेळी विरोधी पक्षनेत्यांनी दिली.